2013 წლის 25 ნოემბერს სამხრეთ აფრიკის ეროვნული ბიბლიოთეკის აღმასრულებელმა დირექტორმა, ჯონ ცებემ პრეტორიაში ხელი მოაწერა ურთიერთგაგების მემორანდუმს სამხრეთ აფრიკის ეროვნულ ბიბლიოთეკასა და საქართველოს პარლამენტის ეროვნულ ბიბლიოთეკას შორის. საქართველოს პარლამენტის ეროვნული ბიბლიოთეკის გენერალურმა დირექტორმა გიორგი კეკელიძემ მემორანდუმს ხელი მოაწერა თბილისში მიმდინარე წლის სექტემბერში.
ამით დასრულდა ორი ქვეყნის ეროვნულ ბიბლიოთეკებს შორის ურთიერთობების ფორმალიზების პროცესი, რომელიც ინიცირებული და მხარდაჭერული იყო პრეტორიაში საქართველოს საელჩოს მიერ.
ხელმოწერილი მემორანდუმის თანახმად, მხარეები ერთობლივად დაგეგმავენ სხვადასხვა ღონისძიებებს და გაცვლიან საინტერესო გამოცემებს.
მემორანდუმზე ხელმოწერის ცერემონიაზე სამხრეთ აფრიკის ეროვნულ ბიბლიოთეკას გადაეცა საქართველოს შესახებ ქართულ, ინგლისურ, გერმანულ და რუსულ ენებზე გამოცემული წიგნები, რომელიც სამხრეთ აფრიკის ეროვნულ ბიბლიოთეკაში ქართული ფონდის ნაწილი გახდება. სამხრეთ აფრიკის ეროვნული ბიბლიოთეკის ქართული კოლექციის გამდიდრებაზე ზრუნვა საქართველოს საელჩოს პატრონაჟით მომავალშიც გაგრძელდება.
