საქართველოს იუსტიციის მინისტრის ბრძანებით, საჯარო რეესტრის ეროვნული სააგენტოს თავმჯდომარის მოვალეობის შემსრულებლად პაპუნა უგრეხელიძე დაინიშნა.
ამ თანამდებობაზე დანიშვნამდე ის საჯარო რეესტრის თავმჯდომარის მოადგილის მოვალეობას ასრულებდა.
პაპუნა უგრეხელიძე დაიბადა 1974 წელს, ქ. თბილისში. დაამთავრა თბილისის ივანე ჯავახიშვილის სახელობის სახელმწიფო უნივერსიტეტის იურიდიული ფაკულტეტი, მოგვიანებით სწავლობდა ქ. ფრაიბურგის ალბერტ ლუდვიგის სახელობის უნივერსიტეტის იურიდიულ ფაკულტეტზე.
1996 წლიდან ეკავა საპასუხისმგებლო თანამდებობები სახელმწიფო და კერძო სტრუქტურებში. სხვადასხვა დროს მუშაობდა ეროვნული უშიშროების საბჭოს თავდაცვის საკითხთა სამსახურში, თავდაცვის სამინისტროს საერთაშორისო ურთიერთობათა და ევროატლანტიკური ინტეგრაციის დეპარტამენტის უფროსის მოადგილედ, საქართველოს ანტიკორუფციულ ბიუროში. სს „ტაოპრივატბანკში" VIP - სამსახურის უფროსად, USAID-ის პროექტის (UEDC) დასავლეთ და აღმოსავლეთ საქართველოს მენეჯერად .
გავლილი აქვს სხვადასხვა საერთაშორისო სასწავლო კურსი.
მონაწილეობა აქვს მიღებული არაერთ საერთაშორისო კონფერენციაში, სემინარსა და სიმპოზიუმში.
ფლობს ინგლისურ, გერმანულ და რუსულ ენებს.
ჰყავს ერთი შვილი.
