რუსეთის მოქალაქეთა უმრავლესობა ელის, რომ საქართველოს ხელისუფლების სათავეში გიორგი მარგველაშვილის მოსვლის შემდეგ მოსკოვისა და თბილისის ურთიერთობები გაუმჯობესდება. ამას საზოგაოდებრივი აზრის კვლევითი ცენტრის მიერ ჩატარებული გამოკითხვის შედეგები ცხადჰყოფს. ინფორმაციას ამის შესახებ რუსული მედია ავრცელებს.
გამოკითხულთა 65 % რუსეთ-საქართველოს ურთიერთობებში დათბობას ელის. ნეგატიურ შედეგებს მხოლოდ 7 % ვარაუდობს ხოლო 23 % მიიჩნევს, რომ ურთიერთობები არ შეიცვლება.
ამავე დროს, გამოკითხულ რუსეთის მოქალაქეთა 44 % მიიჩნევს, რომ საქართველოს ნატოში გაწევრიანება ნეგატიურად აისახება რუსეთ-საქართველოს ურთიერთობებზე. მხოლოდ 13 % მიიჩნევს, რომ საქართველოს ჩრდილოატლანტიკურ ალიანსში წევრობას ორ ქვეყანას შორის დადებითი შედეგები მოყვება.
ხოლო რაც შეეხება საქართველოს ევროკავშირში გაწევრიანებას, გამოკითხულთა აზრით მისი შედეგები ორ ქვეყანას შორის ურთიერთობებში შედარებით შეუმჩნეველი იქნება. გამოკითხულთა 36 % მიიჩნევს, რომ საქართველოს ევროკავშირში წევრობა ურთიერთობებზე არ აისახება.
გამოკითხვა რუსეთის 42 რეგიონის 130 დასახლებულ პუნქტში ჩატარდა და მასში მონაწილეობა 1.3 ათასმა ადამიანმა მიიღო.