სასტუმრო ,,თბილისი მერიოტში'' ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ორგანიზებითა და ევროკავშირის მიერ დაფინანსებული პროექტის მხარდაჭერით მედიის წარმომადგენლებისათვის სემინარი გაიმართა.
სემინარის მონაწილეებს მისასალმებელი სიტყვით მიმართეს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის მთავარმა მრჩეველმა ეკა სეფაშვილმა და საქართველოში ევროკავშირის წარმომადგენლობის ხელმძღვანელმა, ელჩმა ფილიპ დიმიტროვმა.
საქართველოს აღმასრულებელი ხელისუფლების წარმომადგენლებისაგან სემინარის მონაწილეებმა მიმდინარე წლის 28-29 ნოემბერს ვილნიუსში დაგეგმილი ,,აღმოსავლეთ პარტნიორობის სამიტის" შესახებ მოისმინეს ინფორმაცია. სემინარზე განსაკუთრებული ყურადღება დაეთმო ისეთ საკითხებს, როგორიცაა: ასოცირების შესახებ შეთანხმება და მისი ნაწილი, ღრმა და ყოვლისმომცველი თავისუფალი სავაჭრო სივრცის (DCFTA) შესახებ შეთანხმება, ევროპული სამეზობლო პოლიტიკა (ENP) და აღმოსავლეთ პარტნიორობა (EaP); სავიზო რეჟიმის ლიბერალიზაციის შესახებ დიალოგი და საქართველოს მთავრობის სტრატეგია ევროინტეგრაციის საკითხთა კომუნიკაციისა და ინფორმაციის შესახებ 2014-2017 წლებისთვის.
სემინარი აქტიური დისკუსიის რეჟიმში წარიმართა. მედიის წარმომადგენლების შეკითხვებს, რომელიც ძირითადად ვილნიუსის სამიტთან დაკავშირებულ საკითხებს, განსაკუთრებით კი ასოცირების შესახებ შეთანხმების პარაფირების მნიშვნელობასა და ზოგადად შეთანხმების ტექნიკურ დეტალებს ეხებოდა ხელისუფლების წარმომადგენლების მხრიდან ამომწურავი პასუხები გაეცა.