მიხეილ სააკაშვილი და სანდრა რულოვსი ქორწინებიდან მეოცე წლისთავს აღნიშნავენ. ამასთან დაკავშირებით სანდრა რულოვსი "ფეისბუქის" ოფიციალურ გვერდზე წერს. წერილს თან ახლავს მეუღლესთან ერთად გადაღებული ფოტო, რომელიც წყვილმა შეუღლებიდან რამდენიმე ხანში გადაიღო.
"ოცი წლის წინათ 17 ნოემბერს მე ვუთხარი მიშას: "დიახ, თანახმა ვარ". რიგითი დღე, რიგითი სამოსი და ხელში ერთი ვარდი მიჭირავს.
ათი წლის წინათ, 2003 წლის ნოემბერში მე ვუთხარი საქართველოს: "დიახ, მე ამას გავაკეთებ". ჩვეულებრივი ახალგაზრდა ქალი, არაჩვეულებრივი მამაკაცის გვერდით. სადაც კი წავედი, ყველგან ვარდები მივიღე.
დღეს, 2013 წლის 17 ნოემბერს ჩვენი ქორწინების მეოცე წლისთავზე არ არის არც ერთი ვარდი, მაგრამ არის ეკლები და ცრემლები.
ჩვენი პატარა შვილი მიყურებს და კითხულობს მალე თუ დავბრუნდებით სახლში, და კვლავაც, იმედითა და ნდობით აღსავსე, ნიკუშას ვპასუხობ: "დიახ, ჩვენ დავბრუნდებით"... სანდრა, ჰოლანდია", - წერს ყოფილი პირველი ლედი.
