დღეს იუსტიციის სამინისტროს საჯარო რეესტრის ეროვნული სააგენტოს თავმჯდომარე ეკატერინე კერესელიძე და მისი მოადგილე პაპუნა უგრეხელიძე მიწის რესურსებთან დაკავშირებული საარქივო დოკუმენტაციის შენახვა-ინვენტარიზაციის პროცესს დაესწრნენ.
საქართველოს მთავრობის 2013 წლის 26 სექტემბრის N1397 განკარგულებით, იუსტიციის სამინისტროს საჯარო რეესტრის ეროვნულ სააგენტოს დაევალა ყოფილი მიწის მართვის სახელმწიფო დეპარტამენტის მიწათმოწყობის სამეცნიერო-კვლევითი ინსტიტუტის - „საქსახმიწპროექტის" უმეთვალყურეოდ და განადგურების საშიშროების ქვეშ არსებული საარქივო დოკუმენტების აღწერა-დახარისხება.
დღეიდან, სააგენტო იღებს პასუხისმგებლობას აღნიშნული არქივის მოვლა-პატრონობაზე. სააგენტო შეისწავლის, დაახარისხებს და სათანადო საარქივო პირობებში დაიცავს მასალებს, ხოლო მათ ნაწილს, შინაარსის მიხედვით, სხვადასხვა უწყებებს გადასცემს. საჯარო რეესტრის საქმიანობისთვის საჭირო დოკუმენტებს კი ლილოს არქივში განათავსებს.
2004 წელს სახელმწიფომ შეიმუშავა მიწის ადმინისტრირებისა და მართვის ახლებური მიდგომა - მიწის მართვის სახელმწიფო დეპარტამენტი გაუქმდა და მისი ფუნქციები სხვადასხვა უწყებებს შორის გადანაწილდა. საჯარო რეესტრის ეროვნულ სააგენტოს გადმოეცა უძრავი ქონების რეგისტრაციის და კადასტრის წარმოების ფუნქციები, ნაწილი ფუნქციებისა კი სოფლის მეურნეობის, გარემოს დაცვისა და ბუნებრივი რესურსების სამინისტროებს გადაეცათ.
მიწის რესურსების მართვასთან დაკავშირებული ფუნქციების უწყებებს შორის გადანაწილების შემდეგ არაერთი საარქივო მასალა დაიკარგა. ფაქტობრივად, საქართველოს მიწათსარგებლობის და მიწათმოწყობის ისტორიისათვის უმნიშვნელოვანესი დოკუმენტები უყურადღებოდ იყო მიტოვებული.
გადარჩენილი საარქივო დოკუმენტაციის მფლობელი ორგანიზაცია ამ დრომდე არ იყო განსაზღვრული. შესაბამისად, ვერცერთი უწყება ვერ ახერხებდა მათ გამოყენებას და დაცვას. მნიშვნელოვანი დოკუმენტური და საარქივო მასალები, პრაქტიკულად, სათანადო ყურადღებისა და მოვლის გარეშე იყო დარჩენილი. შესაბამისად, არქივის ნაწილი დაიკარგა, ნაწილი - დაზიანდა.
