ექსპერტის კავკასიის საკითხებში მამუკა არეშიძის განცხადებით, ლაფანყურის სპეცოპერაციის საკითხის შესწავლას სამართლებრივი ბერკეტების მქონე სტრუქტურები ამ დრომდე ვერ ახერხებენ და სწორედ ამიტომ, სახალხო დამცველის აპარატთან შექმნილი კომისია საზოგადოებისთვის ინფორმაციის მიწოდების სივრცეს შექმნის.
"ლაფანყურის საქმესთან დაკავშირებით სამართლებრივი ბერკეტი ვისაც აქვს, იმისი ნამუშევარი ჯერ-ჯერობით არ ჩანს და ზუსტად ეს არის, რომ აშფოთებს და აღიზიანებს საზოგადოებას პირველ რიგში ჩვენი ამოცანაა დაინტერესებულ საზოგადოებასთან კომუნიკაციის სივრცის შექმნა. ჩვენ გვაქვს იმის ბერკეტები და საშუალება, რომ დამატებითი ინფორმაცია მივაწოდოთ იმ შემთხვევაში, თუ ისინი ამას მოითხოვენ,"- განაცხადა მამუკა არეშიძემ.
შეგახსენებთ, რომ სახალხო დამცველის აპარატთან შექმნილმა კომისიამ ლაფანყურის სპეცოპერაციის საკითხის შესწავლა დღეიდან დაიყო. აღნიშნული კომისიის მუშაობას საქართველოს მთავრობის წევრები გამოეხმაურნენ. შინაგან საქმეთა მინისტრს ირაკლი ღარიბაშვილს ლაფანყურის საქმეზე შექმნილი საზოგადოებრივი კომისიის ეფექტურობაში ეჭვი ეპარება, საქართველოს სასჯელაღსრულების, პრობაციის და იურიდიული დახმარების საკითხთა მინისტრის სოზარ სუბარისთვის კი, უცნობია, რა ფუნქცია შეიძლება ჰქონდეს ლაფანყურის საქმეზე შექმნილ საზოგადოებრივ კომისიას. რაც შეეხება პარლამენტის ადამიანის უფლებათა დაცვის კომიტეტის თავმჯდომარის ეკა ბესელიას პოზიციას, მისი განცხადებით, ლაფანყურის სპეცოპერაციის საქმის გამოძიება შინაგან საქმეთა სამინისტროს და მთავარი პროკურატურის პრეროგატივაა.
ლაფანყურში ჩატარებული სპეცოპერაციის დეტალების შესწავლის მიზნით სახალხო დამცველის აპარატთან 12 წევრისგან შემდგარი საზოგადოებრივი კომისია შეიქმნა. აღნიშნული კომისიის შემადგენლობაში ომბუდსმენი უჩა ნანუაშვილი, პოლიტოლოგი სოსო ცისკარიშვილი, იურისტი ლია მუხაშავრია, პოლიტოლოგი ვახტანგ მაისაია, ექპერტი კავკასიის საკითხებში მამუკა არეშიძე, ექსპერტი კახა კახიშვილი, უმარ იდიგოვი, ზაურ გუმაშვილი, ხასო ხანგოშვილი, მორატ ქავთარაშვილი, თამარ გაბისონია და გელა ნიკოლაიშვილი შედიან.
