საფრანგეთი ჩინეთთან დიალოგს იყენებს იმისთვის, რომ პეკინს რუსეთზე გავლენის გამოყენებისა და უკრაინაში ომის შეწყვეტისკენ მოუწოდოს. ამის შესახებ საფრანგეთის ევროპისა და საგარეო საქმეთა სამინისტროს წარმომადგენელმა პასკალ კონფავრიომ განაცხადა.
მისი თქმით, რუსეთის პრეზიდენტის, ვლადიმირ პუტინის ჩინეთში ვიზიტის ფონზე ნათლად ჩანს „უკიდურესად დისბალანსებული და დამახინჯებული“ ურთიერთობები რუსეთსა და ჩინეთს შორის, განსაკუთრებით მას შემდეგ, რაც უკრაინაში ომის გამო რუსეთი მრავალი პარტნიორისგან იზოლირებული აღმოჩნდა.
კონფავრიოს განცხადებით, საფრანგეთი ჩინეთთან მუდმივ კომუნიკაციას ინარჩუნებს
„ეს არხი საშუალებას გვაძლევს მივმართოთ ჩინეთს თხოვნით, გამოიყენოს მოსკოვთან თავისი პრივილეგირებული ურთიერთობები და მოუწოდოს ამ აგრესიის შეწყვეტისკენ,“ - განაცხადა მან.
მისივე თქმით, პარიზის რეაქცია ჩინეთ-რუსეთის ურთიერთობების გაღრმავებაზე დაკავშირებულია საფრანგეთის G7-ის თავმჯდომარეობის პრიორიტეტებთან, რომელიც გლობალური ეკონომიკური დისბალანსების შემცირებაზეა ორიენტირებული.
„ეს არის პრიორიტეტი, რომელიც კიდევ უფრო მნიშვნელოვანი ხდება გლობალური უსაფრთხოების კონტექსტში, რომელიც სულ უფრო მწვავდება“, - განაცხადა კონფავრიომ.
