ადამიანი, კანონი, თავისუფლება უკიდურეს შეშფოთებას გამოთქვამს ქალბატონი ელენე თევდორაძის განცხადებაზე, სადაც იგი აცხადებს, რომ ჩვენ არ ვართ მართლები როცა კითხვებს ვსვამთ და ამავდროულად განმარტავს, რომ ეს მისი პრობლემა არაა და აკეთებს იმას, რასაც პრეზიდენტი ავალებს.
"ქალბატონი ელენე თევდორაძე და ბატონი უჩა ნანუაშვილი კიდევ ერთხელ ადასტურებენ, რომ შემოსული განცხადებები განეკუთვნებოდა განსაკუთრებით მძიმე დანაშაულთა ნუსხას და გადაწყვეტილება მიღებულ იქნა მათ შორის შედარებით ნაკლებად მძიმე დამნაშავეთა სასარგებლოდ. გამოდის რომ ცუდსა და უარესს შორის მათ ცუდზე მიიღეს გადაწყვეტილება.
განსაკუთრებით მნიშვნელოვანია აღინიშნოს, რომ როგორც ირკვევა კომისიამ რეკომენდაცია გასცა რამოდენიმე მსჯავრდებულზე, რომლებიც ბრალდებულები არიან ბიზნესის წართმევაშიც.
საზოგადოებას გვინდა შევახსენოთ გუდვილის ფაქტი, როცა აღნიშნული ბრენდის მფლობელებმა სასამართლოს გადახდისუუნაროდ ცნობის შესახებ მიმართეს. მსგავს ფაქტებთან დაკავშირებით ჩვენ დავიწყეთ ინფორმაციების მოძიება სახელმწიფო უწყებებიდან. ყველა სამინისტროს, მთავრობის კანცელარიას და პრეზიდენტის ადმინისტრაციას მივმართეთ ოფიციალური წერილით, რათა გამოვითხოვონ ინფრომაციები, თუ რომელ ბიზნეს კომპანიას ქონდა ბოლო 5 წლის განმავლობაში ჩუქების წესით გადაცემული მათთვის სხვადასხვა ქონება.
ამ მონაცემების მიღებისა და დამუშავების შემდეგ ორგანიზაცია საზოგადოებას მიაწვდის კონკრეტულ მონაცემებს თუ რა თანხებზეა საუბარი. ასევე, გაასაჯაროვებს იმ ბიზნეს კომპანიებს, რომლებიც ნებსით თუ უნებლიედ ჩართულნი იყვნენ ამ პროცესში და მასალებს გადასცემს პროკურატურას მოკვლევისათვის.
ყოველივე ზემოაღნიშნულიდან გამომდინარე, უკიდურესად შემაშფოთებელია იმის მოსმენა, რომ ბიზნესის წართმევაში ბრალდებულები შესაძლებელია შეწყალების კომისიის რეკომენდაციით პრეზიდენტმა შეიწყალოს. ეს კიდევ ერთხელ იქნება დადასტურება იმისა, რომ მათ ჩადენილი დანაშაული ეპატიათ და კიდევ მიეცათ ასპარეზი ემსახურონ იმ დანაშაულებრივ ჯგუფს, რომლის დავალებებსაც ისინი ასრულებდნენ. შესაძლებელია გამოვთქვათ საფუძვლიანი ეჭვი, რომ კომისია (წევრთა გარკვეული ნაწილი) გარკვეულ წილად მართვადია პრეზიდენტის მხრიდან, რათა ქვეყნის ამჟამინდელმა პირველმა პირმა, არჩევნებამდე 2 დღით ადრე შეიწყალოს განსაკუთრებით მძიმე დანაშაულში მსჯავრდებულები და შემდგომ განვითარებულ მოვლენებზე პასუხისმგებლობა შეწყალების კომისიას დააკისროს", -ნათქვამია ორგანიზაცის განცხადებაში.
