დასაველთ საქართველოს ეროვნულ სამედიცინო ცენტრში მოქმედმა ლაბორატორიამ, გერმანიის ბიოანალიზის რეფერენს-ინტიტუტიდან (RfB), ლაბორატორიული კვლევების გარე ხარისხის კონტროლში 100%-იანი შედეგები მიიღო. ამ შედეგების საფუძველზე, ბონის (RfB) ინსტიტუტმა ლაბორატორიას IFCC (International Federation of Clinical Chemistry and Laboratory Medicine)-ის მიერ აღიარებული ხარისხის სერტიფიკატი მიანიჭა.
2012 წლიდან ეროვნული სამედიცინო ცენტრის ლაბორატორია, GMG Group-ის (საქართველოს სამედიცინო ჯგუფი) მიერ მოწოდებული საკონტროლო ნიმუშებით, მუშაობის გარე ხარისხის კონტროლში მონაწილეობს.
„ლაბორატორიული მუშაობის საერთაშორისო სტანდარტის შესაბამისად, კლინიკის ლაბორატორიაში ყოველდღიურად შიდა ხარისხის კონტროლი ტარდება, გარე ხარისხის კონტროლის განსახორციელებლად კი ეროვნულმა სამედიცინო ცენტრმა მსოფლიოში აღიარებული გერმანიის ბიოანალიზის რეფერენს-ინსტიტუტი აირჩია. ბონიდან გამოგზავნილი პასუხები იდენტური აღმოჩნდა ეროვნული სამედიცინო ცენტრის ლაბორატორიის შედეგებისა", - აღნიშნავს დასავლეთ საქართველოს ეროვნული სამედიცინო ცენტრის ხელმძღვანელი, ანჟელა ორჯონიკიძე.
გერმანიაში განხორციელებული კვლევების შედეგად, დასავლეთ საქართველოს ეროვნული სამედიცინო ცენტრის ლაბორატორიამ 99 %-იანი შედეგი აჩვენა - იმუნოლოგიაში და 100 %-იანი - კოაგულოლოგიაში, კარდიალურ მარკერებსა და გაზ-მარილოვან ცვლაში.