საქართველოს რეფორმების ასოციაციის (GRASS) დამფუძნებლები სერგი კაპანაძე და ელენე ხოშტარია ერთობლივ განცხადებას ავრცელებნ, რომლის სრულ ტექტს "ჯი-ეიჩ-ენი" გთავაზობთ:
გუშინ, 14 ოქტომბერს, საზოგადოებრივ მაუწყებელზე საქართველოს პრემიერ-მინისტრმა მორიგი შეურაცხმყოფელი განცხადებები გააკეთა ჩვენს მიმართ. ჩვენ კვლავ არ ვაპირებთ ვუპასუხოთ პრემიერ-მინისტრს მისთვის დამახასიათებელ "რიტორიკულ სტილში" თუმცა, გვსურს განსაკუთრებით მივაპყროთ საზოგადოების ყურადღება რამდენიმე მნიშვნელოვან საკითხს.
ის საკითხები, რომლებზეც ჩვენ გამოვთქვამთ კრიტიკულ მოსაზრებებს, რეკომენდაციებს, ან/და შენიშვნებს, იქნება ეს ეკონომიკა, რუსეთთან ურთიერთობები, თუ სხვა, იმ თემებს მიეკუთვნება, რომლებზეც დღეს ქვეყანაში მძაფრი დისკუსია მიმდინარეობს. ჩვენი კითხვები ეკონომიკის მდგომარეობასთან დაკავშირებით ეფუძნება საერთაშორისო საფინანსო ორგანიზაციების შეფასებებს, გავლენიანი გამოცემების პუბლიკაციებს და სახელმწიფო უწყებების მიერ გავრცელებულ ოფიციალურ სტატისტიკურ მონაცემებს. საგანგაშოა, რომ ეს ციფრები, ფაქტები და შეფასებები სათანადოდ არ აღიქმება პრემიერ-მინისტრის მიერ. ისიც სამწუხაროა, რომ მის მიერ მოყვანილი მთელი რიგი ფაქტებისა (მაგალითად, რეგიონში ერთ სულ მოსახლეზე მთლიანი შიდა პროდუქტის მხრივ საქართველოს მდგომარეობა) უბრალოდ მცდარია. ამიტომ ჩვენს მოვალეობად მივიჩნევთ, მივუთითოთ პრემიერ-მინისტრს, როდესაც ვხედავთ რომ მისი ანალიზი არასწორ ფაქტებს ეფუძნება. მიგვაჩნია, რომ საჯარო პოლიტიკის ანალიზით დაკავებული არასამთავრობო ორგანიზაციების პირდაპირი მოვალეობაა მსგავს განცხადებებზე და შეფასებებზე რეაგირება.
ძალიან სამწუხაროა, რომ ჩვენს მიერ მოყვანილ ფაქტებს და რეკომენდაციებს პრემიერის მხრიდან მოსდევს არა ანალიზი და კონსტრუქციული დისკუსია, არამედ პოლიტიკური იარლიყების მიკერება და საჯარო შეურაცხყოფა, ნაცვლად, რეალური პრობლემების გადაჭრისა. გვსურს ხაზი გავუსვათ, რომ მიუხედავად ამგვარი განცხადებებისა მთავრობის მეთაურის მხრიდან, არ ვაპირებთ არც იმ საკითხებზე გაჩუმებას, რომლებზეც ვთვლით, რომ აუცილებელია ხმამაღლა საუბარი და არც იმ საკითხების უსაფუძვლოდ კრიტიკას, სადაც მთავრობა კრიტიკას არ იმსახურებს. გვინდა შევახსენოთ პრემიერს, რომ ფაქტებისა და ობიექტურობისადმი ჩვენი დამოკიდებულების ყველაზე კარგი საზომი არის ჩვენს მიერ შექმნილი ვებ გვერდი - www.factcheck.ge, სადაც ჩვენ ვაანალიზებთ მთლიანად პოლიტიკური სპექტრის, როგორც მთავრობის, ისე ოპოზიციის მიერ გაკეთებული განცხადებების ფაქტობრივ სიზუსტეს და ვცდილობთ ფაქტებზე დაყრდნობით ობიექტური ინფორმაცია მივაწოდოთ საზოგადოებას.
გუშინდელი განცხადების შემდეგ დაგვრჩა შთაბეჭდილება, რომ ჩვენმა კრიტიკამ იმდენად მიიპყრო პრემიერ-მინისტრის ყურადღება, რომ შემოწმდა ჩვენი წარსული და გვქონდა თუ არა ჩადენილი დანაშაულებრივი ქმედებები. საგანგაშოდ მიგვაჩნია ასეთი მიდგომა, რომლის მიხედვითაც, შეიძლება შეარჩიო კრიტიკულად განწყობილი არასამთავრობო ორგანიზაციების წარმომადგენლები და შერჩევითად შეამოწმო მათ აქვთ თუ არა დანაშაული ჩადენილი. ამგვარი დამოკიდებულება კრიტიკის მიმართ, ჩვენი აზრით, აჩვენებს დემოკრატიულ ღირებულებებთან დაკავშირებულ პრობლემებს.
ბოლოს, გვსურს ხაზი გავუსვათ, რომ მაინც ვიტოვებთ იმედს, რომ პრემიერ-მინისტრი ჩვენთან და ზოგადად არასამთავრობო სექტორთან დიალოგის და სამუშაო შეხვედრების რეჟიმში გააგრძელებს საქმიან ურთიერთობებს, ნაცვლად პირდაპირ ეთერში ჩვენთვის შეურაცხყოფის მოყენებისა. აქვე ვადასტურებთ მზადყოფნას, რომ სამუშაო რეჟიმში შევხვდეთ პრემიერ-მინისტრს და დასაბუთებულად ფაქტებზე დაყრდნობით ვესაუბროთ ქვეყნისთვის მნიშვნელოვან საკითხებზე.
სერგი კაპანაძე
ელენე ხოშტარია
საქართველოს რეფორმების ასოციაციის (GRASS) დამფუძნებლები
