11 ოქტომბერს წმინდა სინოდმა იმსჯელა ბოლო დროს საქართველოში რელიგიური დაპირისპირების შექმნის მცდელობაზე და ხელისუფლებას მუსლიმებსა და ქრისტიანებს შორის სიტუაციის დასარეგულირებლად სამართლებრივი ბაზის შექმნისკენ მოუწოდებს.
,,სამწუხაროდ, უკვე არაერთხელ ქონდა ადგილი მუსლიმებსა და ქრისტიანებს შორის სიტუაციის დაძაბვის მცდელობას, რაც ხელოვნურად შექმნილი პრობლემაა და მიზნად ისახვას ორი ტრადიციული რელიგიის და მათი წარმომადგენლების დაპირისპირებას. წმიდა სინოდმა დაადგინა:ეთხოვოს ხელისუფლებას, დროულად გამოიძიონ განვითარებული მოვლენები, და მიიღონ სათანადო ზომები სამართლებრივი ბაზის შესაქმნელად. აღნიშნული პროცესები პირველ რიგში საქართველოს სახელმწიფოებრიობის წინააღმდეგაა მიმართული და ეს აღარ უნდა გაგრძელდეს", -ნათქვამია განჩინებაში.
წმინდა სინოდი ასევე მოუწოდებს მართლმადიდებელ და მუსლიმ მოსახლეობას შეინარჩუნოს სიმშვიდე და პროვოკაციებს არ აჰყვნენ.
,,მართლმადიდებელ და მუსლიმ მოსახლეობას კი ეთხოვოს, არ აყვნენ პროვოკაციებს, რათა უნებურად ბოროტმზრახველთა მიზნების განხორციელებას არ შეუწყონ ხელი", _ნათქვამია წმინდა სინოდის განჩინებაში.