შინაგან საქმეთა ყოფილი მინისტრი და ექს-პრემიერი ვანო მერაბიშვილი ხობის რაიონის სოფელ ხორგაში გუშინ ჩატარებული სპეცოპერაციის დროს სამართალდამცველის გარდაცვალების გამო მწუხარებას გამოთქვამს.
მერაბიშვილი ასევე ეხმიანება ქვემო ფონიჭალაში გუშინ მომხდარ ფაქტს, რომლის დროსაც "ნაციონალური მოძრაობის" წევრს, ყოფილ სამართალდამცველს მის მიერ წარსულში განხორციელებული დაკავებების გამო, წარსულში ნასამართლევი პირები ფიზიკურად გაუსწორდნენ.
აღნიშნულთან დაკავშირებით ვანო მერაბიშვილის განცხადებას "ჯი-ეიჩ-ენი" უცვლელად გთავაზობთ:
"მინდა მწუხარება გამოვთქვა 12 ოქტომბერს სამსახურებრივი მოვალეობების შესრულების დროს პოლიციის თანამშრომლის, დავით დემურიას გარდაცვალების გამო. ვუსამძიმრებ მის ოჯახს და იმედს გამოვთქვამ, რომ სახელმწიფო მაქსიმალურად გვერდში დაუდგება მათ ამ მძიმე წუთებში. გარდა ამისა, მინდა გამოჯანმრთელება ვუსურვო იმ ოთხ პოლიციელს, რომლებიც ამ ინციდენტის დროს დაშავდნენ. აქვე მინდა შეშფოთება გამოვთქვა კიდევ ერთი საგანგაშო ფაქტის გამო, როდესაც კრწანისის რაიონში თავდასხმა მოხდა ყოფილ პოლიციელზე ლეიტენანტ ავთანდილ მახარამოვზე. გავრცელებული ინფორმაციით, მას თავს დაესხნენ ამნისტირებული პირები, რომელთა დაკავებაშიც წარსულში სწორედ ლეიტენენტი მახარამოვი მონაწილეობდა. როგორც უკვე ავღნიშნე, ეს საკმაოდ საგანგაშო ფაქტია, ვინაიდან თუ თავიდანვე არ იქნა პოლიციელების წინააღმდეგ შურისძიების ფაქტები აღკვეთილი და დამნაშავეები სათანადოდ დასჯილნი, ეს გამოიწვევს ძალადობის კიდევ უფრო მატებას და პოლიციელების დემორალიზებას,"- ნათქვამია ვანო მერაბიშვილის განცხადებაში.
