კვირას, 13 ოქტომბერს ყოფილი პარლამენტარები და არასამთავრობო ორგანიზაციების წარმომადგენლები რუსულ ოკუპაციას დვანიდან გააპროტესტებენ.
აქცია სახელწოდებით - "ერთად დავდგეთ ოკუპაციის წინააღმდეგ!" არასამთავრობო ორგანიზაცია "ახალგაზრდები ევროპული მომავლისთვის" ორგანიზებით იმართება.
აქციის ორგანიზატორების თქმით, მათთვის მიუღებელია ოკუპირებული ცხინვალის რეგიონის მიმდებარე სოფლებში ბოლო პერიოდში განვითარებული მოვლენები და რუსი ოკუპანტების მიერ განხორციელებული მცოცავი ოკუპაცია.
როგორც საპროტესტო შეკრების ორგანიზატორი არასამთავრობო ორგანიზაციის "ახალგაზრდები ევროპული მომავლისთვის" წარმომადგენლები აცხადებენ, აქციას აღნიშნული ორგანიზაციის რეგიონული ფილიალების თანამშრომლებიც შეუერთდებიან.
"რუსეთი კვლავ აგრძელებს საქართველოს ტერიტორიების ანექსიას და ოკუპაციას. მხოლოდ ჩვენი ერთად დგომა დაანახებს ოკუპანტებს, რომ ჩვენ ძალა ვართ!", - ნათქვამია აქციის მონაწილეთა მიმართვაში.
დვანში კვირას დაგეგმილ აქციაზე მანანა ჯებაშვილი, კონსტანტინე გაბაშვილი, ოთარ თოიძე და საქართველოს პარლამენტის სხვა ყოფილი წევრები მივლენ. მომიტინგეებს ზუგდიდის საკრებულოს თავმჯდომარე ლევან კონჯარიაც შეუერთდება.
