10 ოქტომბერს 18:00 საათზე საქართველოს პარლამენტის ეროვნული ბიბლიოთეკის საკონფერენციო დარბაზში ჩეხეთ-საქართველოს დიპლომატიური თანამშრომლობის ოცი წლის იუბილისადმი მიძღვნილი ღონისძიება „პრაღა და თბილისი უშიშროების სამსახურების თვალით" გაიმართება.
ღონისძიების ორგანიზატორები არიან ჩეხეთის რესპუბლიკის საელჩო საქართველოში და შინაგან საქმეთა სამინისტროს არქივი.
ღონისძიებას დაესწრებიან ჩეხეთის ელჩი საქართველოში ივან ესტრაბი და საქართველოს შინაგან საქმეთა მინისტრი ირაკლი ღარიბაშვილი.
ღონისძიებას ასევე დაესწრებიან საქართველოს მთავრობისა და ხელისუფლების, დიპლომატიური კორპუსისა და არასამთავრობო ორგანიზაციების წარმომადგენლები, ქართველი და უცხოელი ისტორიკოსები.
ღონისძიებაზე გამოფენილი იქნება გასულ საუკუნეში ჩეხეთსა და საქართველოში საიდუმლო სამსახურების მუშაობის ამსახველი ბანერები. ამ ბანერებით დამთვალიერებელი დეტალურად შეიტყობს, როგორ უთვალთვალებდნენ უშიშროების სამსახურები უბრალო მოქალაქეებსა თუ არსებული რეჟიმის წინააღმდეგ განწყობილ დისიდენტებს.
ღონისძიების ფარგლებში ასევე გაიმართება შინაგან საქმეთა სამინისტროს არქივის მიერ მომზადებული წიგნის - „დისიდენტური მოძრაობა ჩეხოსლოვაკიასა და საქართველოში (მოკლე მიმოხილვა)" - პრეზენტაცია. გამოცემა სამენოვანია (ქართულ-ჩეხურ-ინგლისური) და დისიდენტური მოძრაობის განვითარებას ასახავს.