დღეს, სასჯელაღსრულების, პრობაციისა და იურიდიული დახმარების საკითხთა მინისტრი ხათუნა კალმახელიძე, საქართველოს პირველი ლედი სანდრა ელიზაბეტ რულოვსი და შრომის, ჯანმრთელობისა და სოციალური დაცვის მინისტრის მოადგილე, ირაკლი გიორგობიანი გლდანის №8 საპყრობილეში ნარკოტიკზე დამოკიდებულ მსჯავრდებულთათვის მეტადონით მკურნალობის მოქმედი პროგრამის შესრულების პროცესს გაეცნენ. ამის შესახებ სასჯელაღსრულების, პრობაციისა და იურიდიული დახმარების საკითხთა სამინისტროს პრესსამსახური იუწყება.
დღესვე, ხათუნა კალმახელიძე და სანდრა ელიზაბეტ რულოვსი ტუბერკულოზით დაავადებულთა სამკურნალო დაწესებულებას ესტუმრნენ და მედპერსონალისგან მსჯავრდებულთა მდგომარეობისა და არსებული პირობების შესახებ ინფორმაცია მიიღეს.
"ჩვენ ყველაფერს გავაკეთებთ იმისათვის, რომ მსჯავრდებულებს საჭიროებისამებრ დავეხმაროთ სამედიცინო და სარეაბილიტაციო კუთხით"-განაცხადა სასჯელაღსრულების, პრობაციისა და იურიდიული დახმარების საკითხთა მინისტრმა.
სანდრა ელიზაბეტ რულოვსმა კი აღნიშნა, რომ ხათუნა კალმახელიძესთან ერთად მსჯავრდებული არასრულწლოვნების და ქალების დახმარების და დასაქმების სამომავლო გეგმები განიხილა.
როგორც ცნობილია, პროექტი პირველი ლედის თანადგომით ხორციელდება.
