სოჭის ზამთრის ოლიმპიურ თამაშებში ქართველი სპორტსმენების მონაწილეობის თაობაზე მიღებული გადაწყვეტილების შეცვლის მოთხოვნით პრემიერ-მინისტრ ბიძინა ივანიშვილის ბიზნეს ცენტრთან პერმანენტული აქციები გაიმართება.
როგორც დღეს გამართულ პრესკონფერენციაზე აღნიშნული აქციის ორგანიზატორმა "თავისუფალი ზონის" ერთ-ერთმა წევრმა თამარ იოსელიანმა განაცხადა, "თავისუფალი ზონა" გმობს დღევანდელი ხელისუფლების მაამებლურ პოლიტიკას რუსეთთან მიმართებაში და მიიჩნევს, რომ საქართველოს პრემიერ-მინისტრმა ბიძინა ივანიშვილმა ღიად უნდა დააფიქსიროს თავისი პოზიცია.
"ჩვენ ვიწყებთ პერმანენტულ აქციებს პრემიერმინისტრის რეზიდენციასთან და ყოველ დღე, 17:00 სთ-ზე ვთხოვთ ყველას, ნებისმიერი მრწამსისა და და იდეოლოგიის ადამიანს, ყველას ვისაც უყვარს სამშობლო, ჩაერთოს ამ კამპანიაში და შემოგვიერთდეს. ჩვენ გვსურს დავანახოთ ივანიშვილს, რომ არ შეიძლება დავივიწყოთ აფხაზეთი და ე.წ. სამხრეთ ოსეთი, არ შეიძლება დავივიწყოთ ის მცოცავი ანექსია, რასაც რუსეთი ყოველდღიურად ახორციელებს. არ ვურევთ სპორტსა და პოლოიტიკას, მაგრამ ჩვენთვის აფხაზეთი და ე.წ. სამხრეთ ოსეთი პოლიტიკა არ არის. გვსურს, რომ დღევანდელმა ხელისუფლებამ გაითავისოს პასუხისმგებლობა და საქართველოს ოლიმპიადაში მონაწილეობასთან დაკავშირებით, თავისი პოზიცია დააფიქსიროს", - განაცხადა თამარ იოსელიანმა.
