სრულიად საქართველოს კათოლიკოს პატრიარქის ქორეპისკოპოსის, მეუფე იაკობის განცხადებით, "ბოლო წლებში ძალიან მოდური გახდა ეკლესიის წინააღმდეგ გამოსვლები და გალაშქრება, მაგრამ ეკლესიას არ ეშინია იმის, რაც იწერება ან ტელევიზიით გადაიცემა, რადგან ყველაფერს თავისი მკითხველი და მაყურებელი ჰყავს".
დღევანდელ საკვირაო ქადაგებაზე მეუფე იაკობი საქართველოს ოკუპირებული ტერიტორიების საკითხსაც შეეხო და აღნიშნა, რომ მისთვის აფხაზეთი და ცხინვალის რეგიონი ისევეა ოკუპირებული, როგორც ტაო-კლარჯეთი.
"ბოლო წლებში ძალიან მოდური გახდა ეკლესიის წინააღმდეგ გამოსვლები და გალაშქრება. ყველამ ვიცით იმათი გვარები, ვისაც ასეთი მწერლობა ეხერხება, ისიც კარგად ვიცით საიდან ფინანსდებიან, ისიც კარგად ვიცით მათი ქართველი პატრონები ვინც არიან და უბრალოდ, რადგან ჩვენს ქვეყანას ასე უჭირს, რადგან მტერს ჩვენი ქვეყნის ძალიან უდიდესი ნაწილი აქვს დაპყრობილი და დაპყრობილ ტერიტორიებში მე მარტო აფხაზეთს და ცხინვალის რეგიონს არ ვგულისხმობ, ჩემთვის ტაო-კლარჯეთი ისეთივე დაპყრობილია და ჩვენი საქართველოს სხვა ნაწილები. მნიშვნელობა არ აქვს ვინ წამართმევს მე, ვინც წამართმევს, კეთილი უნდა ინებოს და დამიბრუნოს. ვთხოვდი მათ, ვინც ასე არის გადაკიდებულია ეკლესიაზე, ჯერ თავიანთ თავებს მიხედონ თუ რა გაუკეთებიათ ან რის გაკეთებას აპირებენ და თუ გვინდა, რომ ჩვენი ქვეყანა გადარჩეს, ერთობა უნდა გვქონდეს და კინკლაობა არ უნდა გვქონდეს ერთმანეთში,"- განაცხადა მეუფე იაკობმა.