საქართველოში მოქმედი 50-მდე უმაღლესი სასწავლებლის სტუდენტური თვითმმართველობების წარმომადგენლები დვანში ერთობლივ აქციას გამართავენ და რუსულ ოკუპაციას გააპროტესტებენ.
როგორც აქციის ერთ-ერთმა ორგანიზატორმა, სოხუმის სახელმწიფო უნივერსიტეტის სტუდენტური თვითმმართველობის პრეზიდენტმა გიორგი ომარაშვილმა "ჯი-ეიჩ-ენთან" საუბრისას აღნიშნა, ხვალ დადეგმილ საპროტესტო აქციაში მონაწილეობას სახელმწიფო უნივერსიტეტების სტუდენტებთან ერთად სხვადასხვა კოლეჯების და კერძო სასწავლებლების სტუდენტებიც მიიღებენ.
ამასთან, მისივე თქმით, ხვალ 12:00 საათზე დვანში, საქართველოში მოქმედი 50-მდე სხვადასხვა უმაღლესი სასწავლებლის სტუდენტური თვითმმართველობების წარმომადგენლები ადგილობრივი მოსახლეობის მხარდასაჭერ პროექტთან დაკავშირებით სპეციალურ განცხადებას გააკეთებენ.
"ჩვენი მიზანია შევახსენოთ მსოფლიოს და საერთაშორისო ორგანიზაციებს, რომ 21-ე საუკუნეში მავთულხლართები და ოკუპაცია დაუშვებელია. ასევე, გვინდა სოლიდარობა გამოვუცხადოთ ადგილობრივ მოსახლეობას და დავგმოთ ბოლო პერიოდში იქ განვითარებული მოვლენები. ასევე, სტუდენტური თვითმმართველობები ადგილობრივი მოსახლეობის მხარდაჭერის მიზნით, წარმოვადგენთ ჩვენს მიერ შემუშავებულ სპეციალურ ინიციატივას სოციალური პროგრამის შესახებ, რომელიც ითვალისწინებს სტუდენტთა მასიურ ჩართულობას ადგილობრივი დაზარალებული მოსახლეობის დასახმარებლად შემუშავებულ პროგრამებში,"- განაცხადა გიორგი ომარაშვილმა.
სხვადასხვა უნივერსიტეტების სტუდენტური თვთმმართველობების ერთობლივი აქციის მონაწილეები ხვალ 09:00 საათზე სააკაძის მოედნის მიმდებარე ტერიტორიიდან გავლენ და სპეციალური განცხადების გაჟღერებას 12:00 საათისთვის გეგმავენ.