ლენტეხის რაიონში, დარიშხანის ყოფილი მეტალურგიული კომბინატის ჯებირის დაზიანებისას დასაწყობებული ნარჩენების მდინარე ცხენისწყალში მოხვედრის გამო, გარემოსა და ბუნებრივი რესურსების დაცვისა და რეგიონული განვითარებისა და ინფრასტრუქტურის სამინისტროების ერთობლივ განცხადებას ავრცელებენ.
„წყლის ხარისხი მდინარე ცხენისწყალში ზღვრულად დასაშვები ნორმის ფარგლებშია და არ წარმოადგენს საფრთხეს მოსახლეობისათვის.
მოგეხსენებათ, 27 სექტემბერს, მდინარე ცხენისწყლის ადიდების გამო, დაზიანდა ლენტეხის რაიონში დარიშხანის ყოფილი მეტალურგიული კომბინატის ჯებირი, რის შედეგადაც ამ ტერიტორიაზე დასაწყობებული ნარჩენების რამდენიმე კასრი მოხვდა მდინარეში.
გარემოსა და ბუნებრივი რესურსების დაცვის სამინისტროს მოწვევით და გერმანიის მთავრობის მხარდაჭერით, ქართველი სპეციალისტების დასახმარებლად და რეკომენდაციების გაწევის მიზნით, საქართველოს ეწვივნენ მანჰაიმის სახანძრო და კატასტროფებისაგან დაცვის სამსახურის წარმომადგენლები დოქტორ რალფ რუდოლფის ხელმძღვანელობით.
კვირის განმავლობაში ქართველი და უცხოელი ექსპერტების მიერ აღებულ იქნა წყლის სინჯები მდინარის შერჩეული წერტილებიდან, აგრეთვე ლაჯანურის და ცაგერის წყალსაცავებიდან, შემოწმდა ქუთაისისა და სამტრედიის წყალმომარაგების სისტემები. ლაბორატორიული კვლევების შედეგად დადგინდა, რომ როგორც მდინარეში, ისე წყალსაცავებში მავნე ნივთიერების კონცენტრაცია შეესაბამება დადგენილ ნორმებს.
საქართველოს რეგიონული განვითარებისა და ინფრასტრუქტურის სამინისტრომ, თავის მხრივ, ადგილზე განახორციელა გადაუდებელი სამუშაოები. მოხდა მდინარე ცხენისწყლისთვის კალაპოტის შეცვლა და მოიხრეშა ტერიტორია, რათა უამინდობის შემთხვევაში თავიდან იქნას აცილებული დამატებითი რისკები. აგრეთვე, მდინარის ამ მონაკვეთზე დაიგეგმა ნაპირდამცავი სამუშაოები", - ნათქვამია განცხადებაში.
