3 ოქტომბერს გაიმართა შეხვედრა აშშ-ის პოპულაციის, ლტოლვილთა და მიგრაციის ბიუროს მდივნის მოადგილესთან, სიმონ ჰენშოუსთან. საქართველოს მხრიდან შეხვედრას ესწრებოდნენ მინისტრი, დავით დარახველიძე, მინისტრის მოადგილე, ნინო ჭავჭავაძე, გლუკ-ის წარმომადგენელი საქართველოში, სიმონე ვოლკენი, გაეროში საქართველოს მუდმივი კომისიის წარმომადგენელი, ელჩი შალვა ცისკარაშვილი და სამინისტროს საერთაშორისო ურთიერთობების უფროსის მოადგილე, მედეა გუგეშაშვილი.
შეხვედრაზე მინისტრმა მადლობა გადაუხადა ბიურის წარმომადგენლებს საქართველოსთვის გაწეული დახმარებისთვის. მან აღნიშნა, რომ აშშ-ის დახმარებით სულ ცოტა ხნის წინ საცხოვრებელი ფართები გადაეცა 300 დევნილთა ოჯახს, ასევე მომავალი წლის შუა თვეებში დასრულდება 26 შენობის რეაბილიტაცია, სადაც დევნილები შესახლდებიან. მინისტრმა ასევე ისაუბრა საქართველოში ლტოლვილთა რაოდენობის მზარდი დინამიკის, ეკო-მიგრანტთა პრობლემების, მუსულმანი მესხების რეპატრიაციისა და სხვა საკითხების შესახებ, რომელთა მოგვარებისთვის აუცილებელია დონორი ორგანიზაციების მხარდაჭერა. მინისტრმა პრობლემების სრული მოგვარებისათვის საჭირო თანხად მილიარდნახევარი დოლარი დაასახელა და განახცადა, რომ დონორთა დახმარების გარეშე ამ თანხის თავმოყრა სახელმწიფოსთვის ამ ეტაპზე შეუძლებელი იქნება.
საქართველოში გლუკ-ის წარმომადგენელმა, სიმონე ვოლკენმა, ხაზი გაუსვა იმ ფაქტს, რომ იმ ქვეყნებს შორის, რომელთაც იძულებით გადაადგილების პრობლემა აქვთ, საქართველოს უპირატესობა გააჩნია ამ პრობლემის ეფექტური მოგვარების თვალსაზრისით. მისი განცხადებით, არც ისე ბევრია მთავრობა, რომელიც მოწოდებულია პრობლემის ეფექტურ მოგვარებაზე; საქართველოში კი ეს მოცემულობა სრულად გვაქვს, შესაბამისად არაფერი ეღობება წინ პრობლემების გადაჭრას, თუკი ქვეყანა მიიღებს ფინანსურ დახმარებას საერთაშორისო საზოგადოების მხრიდან. ამასთან, ქალბატონმა ვოლკენმა აღნიშნა, რომ პრობლემების მოგვარება უნდა მოხდეს რაც შეიძლება მალე, რადგან შემდგომ მომავალი თაობა მოგვთხოვს პასუხს იმისთვის, რომ მათი დახმარების შანსი ყველაზე ხელსაყრელ პერიოდში გავუშვით. ამასთან, პრობლემების დროული მოგვარება, თავიდან აგვაცილებს სიტუაციის შემდგომ გამწვავებას.
ჰენშოუმ მადლიერება გამოხატა შეხვედრის ინიცირებისა და მინისტრის მიერ მისთვის მიწოდებული ინფორმაციისთვის. მან აღნიშნა, რომ აშშ ყოველთვის იყო საქართველოს დიდი გულშემატკივარი და მხარდამჭერი და მომავალშიც ასე გაგრძელდება. იგი ასევე დაინტერესდა იმით, თუ როგორ შეუძლია აშშ-ის წარმომადგენლობას ჟენევის მოლაპარაკებების პროცესებში საქართველოს სასარგებლოდ ჩართვა. როგორც გაეროსა და საერთაშორისო ორგანიზაციებში საქართველოს მუდმივმა წარმომადგენელმა, ბატონმა შალვა ცისკარაშვილმა აღნიშნა, ჟენევის მოლაპარაკებებში სამწუხაროდ პროგრესი არ შეიმჩნევა. მისი განცხადებით, ამ მოლაპარაკებებში დიდი დრო ეთმობა დე-ფაქტო ხელისუფლების წარმოადგენლების სტატუსისა და შეხვედრების ფორმატის თაობაზე განხილვებს, მაშინ როცა სუბსტანციურ და არსებითი მნიშვნელობის მქონე საკითხებზე განხილვები არც დაწყებულა.
ბიუროს მდივნის მოადგილემ საქართველოს დახმარება აღუთქვა ჟენევის მოლაპარაკებების ეფექტურად და საქართველოს სასარგებლოდ წარმართვის საქმეში. ამასთან, მან განაცხადა, რომ განაგრძობს დევნილთა დახმარებას სხვადასხვა მიმართულებებით - საარსებო წყაროების, ჯანდაცვისა და სფეროებში, არასამთავრობო სექტორის მეშვეობით. ჰენშოუმ ხაზი გაუსვა იმ ფაქტს, რომ აშშ რჩება საქართველოს მხარდამჭერ პარტნიორად და იმედი გამოთქვა სამინისტროსთან მომავალი თანამშრომლობის თაობაზე.
