გუტიერეშმა მინისტრისგან მოისმინა ინფორმაცია საქართველოში დევნილთა, ლტოლვილთა და სამინისტროს სხვა ბენეფიციართა მდგომარეობის შესახებ, ასევე გაეცნო სამინისტროს მიერ დაგეგმილ ღონისძიებებს, არსებულ პრობლემებსა და მათი გადაჭრის გზებს. ამასთან მინისტრმა ხაზი გაუსვა იმ ფაქტს, რომ პრობლემების გადაჭრისთვის ყველა წინაპირობა არსებობს საქართველოში - ამის თაობაზე არის ხელისუფლების დიდი სურვილი, იქმნება საერთაშორისო სტანდარტებთან შესაბამისი საკანონმდებლო ბაზა, მიმდინარეობს ინტენსიური თანამშრომლობა საერთაშორისო თანამეგობრობასთან და სხვა. შესაბამისად რჩება ფინანსური დახმარება, რომლის დონორთა საზოგადოებიდან მიღების შემთხვევაშიც ქვეყანა ეფექტურად მოაგვარებს პრობლემებს და თავიდან აიცილებს ამ პრობლემათა შემდგომ გამწვავებასა და ზრდას.

მინისტრმა ასევე ხაზი გაუსვა ხელისუფლების მიდგომას კონფლიქტის მოგვარების მიმართ და აღნიშნა, რომ ამ მხრივ მიღებული ყველა ზომა იქნებოდა მშვიდობიანი. მან ასევე ისაუბრა კონფლიქტის შედეგად დაშორებულ ადამიანთა შორის კონტაქტების დამყარების ფაქტების, ასევე ამგვარი კომუნიკაციის მნიშვნელობის თაობაზე და განაცხადა, რომ ხელისუფლება ყველაფერს გააკეთებს იმისთვის, რომ საქართველო მიმზიდველი გახადოს აფხაზეთსა და ცხინვალის რეგიონში მცხოვრები ჩვენი თანამემამულეებისთვის.
გუტიერეშმა მადლიერება გამოხატა შეხვედრის ინიცირებისა და მინისტრის მიერ გაჟღერებული მიდგომების მისამართით. აღნიშნა, რომ კარგად იცნობს საქართველოში დევნილთა და ლტოლვილთა მდგომარეობას, მოინახულა რა საქართველო რამოდენიმე წლის წინ. მან საქართველოს სრული დახმარება აღუთქვა, განაცხადა რა რომ ყველაფერს იღონებს, რათა საქართველომ ისარგებლოს დონორთა დახმარებით; ასევე ხაზი გაუსვა იმას, რომ საქართველოს საკითხი ყოველთვის იქნება გაეროს ლტოლვილთა უმაღლესი კომისარიატის განხილვების თემა და საქართველოში იძულებით გადაადგილების საკითხი სამომავლოდაც შეინარჩუნებს აქტუალობას, ამ პრობლემის სრულ გადაჭრამდე.