"ჯერ ექსპერტებს ჩაუტარა აღმზრდელობითი სამუშაო, მერე ჟურნალისტებს და ახლა არასამთავრობო ორგანიზაციებს უნდა შევხვდეო და ასე შემდეგ, კი ბატონო, ყველას აქვს უფლება შეხვდეს ვიღაცეებს და აკრიტიკოს, მაგრამ ამას თუ გააკეთებდა მერე, როდესაც პრემიერ-მინისტრობიდან წავიდოდა, უკეთესი იქნებოდა"- ამის შესახებ "პალიტრა მედიას" ჟურნალისტმა მერაბ მეტრეველმა პრემიერ-მინისტრ ბიძინა ივანიშვილსა და ცენტრალური ტელევიზიების საინფორმაციო სამსახურების წარმომადგენლებთან დღეს გამართული რამდენიმესაათიანი აუდიენციის შეფასებისას განაცხადა.
"თუ მას უნდა, რომ აკრიტიკოს კონკრეტული ჟურნალისტი გამონათქვამების გამო, მაშინ ის კი არ უნდა დაეყრდნოს პრეს-ცენტრის მიერ მომზადებულ კონტექსტიდან ამოგლეჯილ მასალებს, კეთილი უნდა ინებოს, ყველა გადაცემას უყუროს, ყველა სტატია თავიდან ბოლომდე წაიკითხოს და ამის შემდეგ აკრიტიკოს ჟურნალისტები,"- განაცხადა მერაბ მეტრეველმა.
საქართველოს პრემიერ-მინისტრი ბიძინა ივანშვილი დღეს ცენტრალური ტელევიზიების საინფორმაციო სამსახურების ხელმძღვანელებს და პოლიტიკური თოქ-შოუების წამყვანებს შეხვდა. პრემიერის და ჟურნალისტების აუდიენცია დაახლოებით, 4 საათი გაგრძელდა.
