"მისაჯირყვნად დაგვიძახეს და მიგვჯირყვნეს,"- ამის შესახებ ტელეკომპანია "კავკასიას" ჟურნალისტმა ალეკო ელისაშვილმა პრემიერ-მინისტრ ბიძინა ივანიშვილსა და ცენტრალური ტელევიზიების საინფორმაციო სამსახურების წარმომადგენლებთან დღეს გამართული რამდენიმესაათიანი აუდიენციის შეფასებისას განაცხადა.
"სერიოზულად თუ ვიტყვით, მთავარი არის ის, რომ ისეთი ქვეყანა მივიღეთ იმ ყველაფრიდან ერთი წლის თავზე, რომ, რომ გამოვედი, მიუხედავად ცხარე კამათისა და მიუხედავად იმისა, რომ ზოგ შემთხვევაში მიუღებელი იყო ის, რაც პრემიერ-მინისტრმა თქვა, შიში ნამდვილად არ მაქვს, რომ ახლა ქვემოთ რომ ჩავალ, პოლიცია რაღაცას ჩამიდებს და გლდანის ციხეში "გამბერავენ" ცემაში და ჯაშუშობას დამაბრალებენ,"- განაცხადა ალეკო ელისაშვილმა.
საქართველოს პრემიერ-მინისტრი ბიძინა ივანშვილი დღეს ცენტრალური ტელევიზიების საინფორმაციო სამსახურების ხელმძღვანელებს და პოლიტიკური თოქ-შოუების წამყვანებს შეხვდა. პრემიერის და ჟურნალისტების აუდიენცია დაახლოებით, 4 საათი გაგრძელდა.