"რაღაცნაირად იყო მცდელობა იმისი, რომ ჟურნალისტებისთვის გაკვეთილი ჩაეტარებინათ,"- ამის შესახებ TV-3-ის გადაცემა "დიდი პოლიტიკის" წამყვანმა ინგა გრიგოლიამ პრემიერ-მინისტრ ბიძინა ივანიშვილსა და ცენტრალური ტელევიზიების საინფორმაციო სამსახურების წარმომადგენლებთან დღეს გამართული რამდენიმესაათიანი აუდიენციის შეფასებისას განაცხადა.
"მაგალითად ისეთი, რომ შენ არ უნდა დასვა კრიტიკული კითხვა, იმიტომ, რომ ამით რომელიღაც მინისტრს შეიძლება ეტკინოს გული. ეს ტონი, რომლითაც ჟურნალისტებთან მიდიოდა საუბარი, რაღაცა მითითებები და ასე შემდეგ, ეს არ იყო სასიამოვნო მოსასმენი. რა თქმა უნდა, არ არის სასიამოვნო, როდესაც შენ გეუბნებიან, რომ ხარ ფოსტალიონი, როდესაც შენგან ითხოვენ, რომ არგუმენტები თქვა, დაასახელო, შენ უსახელებ, მაგრამ პასუხად მაინც იღებ იმას, რომ შენ დეზინფორმაციას ავრცელებ,"- განაცხადა ინგა გრიგოლიამ.
საქართველოს პრემიერ-მინისტრი ბიძინა ივანშვილი დღეს ცენტრალური ტელევიზიების საინფორმაციო სამსახურების ხელმძღვანელებს და პოლიტიკური თოქ-შოუების წამყვანებს შეხვდა. პრემიერის და ჟურნალისტების აუდიენცია დაახლოებით, 4 საათი გაგრძელდა.
