საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ, მოადგილესთან ნინო ჭავჭავაძესთან ერთად გამართა ორმხრივი შეხვედრა შვეიცარიის განვითარების სააგენტოსთან (SDC).
SDC-ს მხრიდან შეხვედრას ესწრებოდა ელჩი და ორგანიზაციის ვიცე დირექტორი, მანუელ ბესლერი. მინისტრმა ბესლერს მადლობა გადაუხადა დევნილთა და ეკო-მიგრანტთათვის გაწეული დახმარებისათვის და მოახსენა იმ საჭიროებების შესახებ, რომელიც სამინისტრომ 3 წლის განმავლობაში უნდა მოაგვაროს.
ბესლერმა განაცხადა, რომ შეხვედრამდე შედგა იმ პროგრამის განხილვა, რომელიც 44 ოჯახისთვის (40 ეკო-მიგრანტი და 4 დევნილი ოჯახი) მიწის ნაკვეთიანი ინდივიდუალური სახლის შეძენას ითვალისწინებდა. პროგრამას ხელი მოეწერა და მისი განხორციელება შესაძლებელია მოკლე ვადაში იქნას დაწყებული.
ბესლერი დაინტერესდა ეკო-მიგრანტი ბენეფიციარების შერჩევის კრიტერიუმებით, რაზეც მინისტრმა მიაწოდა ინფორმაცია იმ აქამდე უპრეცედენტო ნორმატიული აქტის შესახებ, რომელიც არეგულირებს ეკო-მიგრანტების პრიორიტეტიზაციას საცხოვრებლების გადაცემის პროცესში, მათი მოწყვლადობიდან გამომდინარე (ქულათა სისტემის გამოყენებით). ასევე მინისტრმა ისაუბრა ახალი კანონპროექტის შესახებ, რომელიც ეკო-მიგრანტების სტატუსსა და მათ უფლებებს დაარეგულირებს.
ბესლერი ასევე დაინტერესდა სამომავლოდ ბუნებრივი მოვლენების შედეგად ადამიანთა გადაადგილების პრევენციის საკითხით. მინისტრის განმარტებით ამ ადამიანებისთვის შემდგომი გადაადგილების პრევენციას წარმოადგენს მათი იმ ადგილებში ჩასახლება, სადაც მინიმალურია ბუნებრივი მოვლენების (მეწყერი, წყალდიდობა და სხვა) ალბათობა და მათ აღარ მოუწევთ იგივე მიზეზით სხვა რეგიონებში გადასახლება.
მიუხედავად იმისა, რომ ზემოხსენებული პროგრამა SDC-ის დახმარების მეორე ფაზის დამასრულებელი ეტაპია, ბესლერმა განაცხადა, რომ გადახედავს ეკო-მიგრანტთა დახმარების შემდგომი გაგძელების შესაძლებლობასაც, რადგან მოცემული პროექტით მხოლოდ შეზღუდული რაოდენობის ოჯახთა დახმარება ხერხდება, ეკო-მიგრანტთა საერთო რაოდენობის (37 000-ზე მეტი) გათვალისწინებით.