"მე პრემიერის მიერ მედიის მიმართ გამოთქმულ ვერც ერთ შენიშვნას ვერ მივიღებ,"- ამის შესახებ საზოგადოებრივი მაუწყებლის ჟურნალისტმა ეკა მიშველაძემ პრემიერ-მინისტრ ბიძინა ივანიშვილსა და ცენტრალური ტელევიზიების საინფორმაციო სამსახურების წარმომადგენლებთან დღეს გამართული რამდენიმესაათიანი აუდიენციის დასრულების შემდეგ განაცხადა.
როგორც მიშველაძემ "ჯი-ეიჩ-ენთან" საუბრისას აღნიშნა, პირადად მისთვის და ნებისმიერი ჟურნალისტისთვის გაცილებით უკეთესია, რომ ასეთი რანგის პოლიტიკურ ფიგურებთან შეხვედრები მათ გადაცემებში მოხდეს, რადგან გადაცემის წამყვანს მისთვის და საზოგადოებისთვის საინტერესო ყველა კითხვის დასმის შესაძლებლობა მიეცეს.
"რამდენად სასარგებლო იყო ასეთი ტიპის შეხვედრა საზოგადოებისთვის, ამას ალბათ თვითონ საზოგადოება განსაზღვრავს. ერთი რამე ვიცი, რომ ჩემთვის პირადად უკეთესია, რომ ასეთი რანგის პოლიტიკოსები ჩვენთან ეთერში მოვიდნენ და მეტად გვექნება საშუალება, რომ მათ დავუსვათ კითხვები და მე სრულიად პასუხისმგებელი ვარ იმაზე, რასაც ვაკეთებ, რა კითხვებსაც მე ვსვამ. ჩემს საქმიანობაზე სრულიად პასუხისმგებელი ვარ. რაც შეეხება მოვახერხეთ თუ არა ყველა კითხვაზე ამომწურავი პასუხის მიღება, ყველა კითხვის დასმა საერთოდ ვერ მოვახერხეთ, იმიტომ, რომ მსგავს ფორმატში შეუძლებელია ჟურნალისტმა ყველა კითხვის დასმა შეძლოს. სწორედ ამიტომ ვამბობ, რომ ჩემთვის და ალბათ ყველა წამყვანისა და ჟურნალისტისთვის უკეთესია, რომ მას ერთი-ერთზე ყველა გადაცემაში ჰქონდეს ამის საშუალება და ყველა მისთვის და არა მარტო მისთვის, არამედ საზოგადოებაში გაჩენილი ყველა საინტერესო კითხვა დასვას"- განაცხადა ეკა მიშველაძემ.
რაც შეეხება დღეს გამართული რამდენიმესაათიანი შეხვედრის მთავარ მესიჯს, მიშველაძის თქმით, "მისთვის მთავარი იყო ის, რომ მან გაიგო პრემიერ-მინისტრის დამოკიდბულება ზოგადად მედიის მიმართ".
"ზოგადად, მას არაერთგვაროვანი დამოკიდებულება აქვს მედიის მიმართ, როგორც მივხვდი. ამ შეხვედრის შემდეგ შემიძლია ეს ვთქვა. მან კონკრეტული გვარებიც დაასახელა. ერთ რამეში კატეგორიულად ვერ დავეთანხმები პრემიერს, იმაში, რომ ჟურნალისტებმა შეკითხვები შერჩევით უნდა დასვან. აბსოლუტურად ვეთანხმები იმაში, რომ ჟურნალისტმა შეკითხვა დაუზუსტებლად არ უნდა დასვას და არავითარ შემთხვევაში კითხვაში ჟურნალისტის პოზიცია არ უნდა ჩანდეს, კითხვა არ უნდა შეიცავდეს უკვე შენთვის სასურველ პასუხს, ეს არის ჟურნალისტიკის ანბანი და ეს ყველამ კარგად ვიცით. იმ მოსაზრებაშიც ვეთანხმები, რომ აუცილებელია კითხვები კომპეტენტურ ადამიანებს დავუსვათ, ოღონდ ვინ არის კომპეტენტური ამას თვითონ ის ჟურნალისტი თავისით წყვეტს. შესაბამისად, ჟურნალისტის კომპეტენტურობაზეა დამოკიდებული როგორ სვამს ის კითხვას, ვის უსვამს და საერთოდ როგორ იცავს ნებისმიერ ბალანსს, ეთიკის ნორმებს თუ ასე შემდეგ. მე მის მიერ მედიის მიმართ გამოთქმულ ვერც ერთ შენიშვნას ვერ მივიღებ,"- აღნიშნა ეკა მიშველაძემ.