მსოფლიო ბანკის ახალი ანგარიშის მიხედვით, სწრაფად მზარდი მეწარმეობის და ინოვაციის მხარდაჭერას უდიდესი მნიშვნელობა აქვს საქართველოში სამუშაო ადგილებისა და სტაბილური ეკონომიკური ზრდის უზრუნველსაყოფად. საქართველოს კონკურენტუნარიანი ეკონომიკური ზრდის და სამუშაო ადგილების შექმნის პროცესში, მეწარმეობის და ინოვაციური მცირე და საშუალო საწარმოების როლზე დღეს თბილისში გამართულ მრგვალ მაგიდაზე მსჯელობდნენ. აღნიშნული დისკუსია მსოფლიო ბანკის, საქართველოს ეკონომიკის და მდგრადი განვითარების სამინისტროს, საერთაშორისო სავაჭრო პალატის და საქართველოს მცირე და საშუალო საწარმოების ასოციაციის მიერ ერთობლივად იქნა ორგანიზებული. აღნიშნული დისკუსიისთვის ასევე მნიშვნელოვანი იყო მსოფლიო ბანკის მიერ ახლახანს მომზადებული კვლევა- „მეწარმეობის ხელშეწყობა საქართველოში" გაზიარება.
როგორც მსოფლიო ბანკში განმარტავენ, გლობალურ ეკონომიკაში კერძო სექტორი 10-დან 9 სამუშაო ადგილს ქმნის. აქედან გამომდინარე მიმზიდველი საინვესტიციო კლიმატის და ახალი ბიზნესის წამოწყებისთვის ხელსაყრელი ბიზნეს გარემოს შექმნა და კერძო სექტორის განვითარება ქვეყანაში სტაბილური ეკონომიკური წინსვლისა და სიღარიბის შემცირების უმთავრესი წინაპირობებია.
„თუმცა, საქართველოში მცირე და საშუალო ბიზნესი მთლიანი შიდა პროდუქტის 20 პროცენტზე ნაკლებს შეადგენს, რაც ბევრ მეზობელ ქვეყანაში დაფიქსირებულ მონაცემებთან შედარებით საკმაოდ დაბალი მაჩვენებელია (მაგალითად სომხეთში მცირე და საშუალო საწარმოები მთლიანი შიდა პროდუქტის 42%-ს შეადგენენ), ხოლო ევროპისა და ცენტრალური აზიის რეგიონში მცირე და საშუალო ზომის საწარმოები, საშუალოდ, მთლიანი შიდა პროდუქტის 60 პროცენტს შეადგნენ. მსოფლიო ბანკის 2013 წლის კვლევის - „მეწარმეობის ხელშეწყობა საქართველოში" მიხედვით, ქართული ინოვაციური საწარმოები 30%-ით მეტ სამუშაო ადგილებს ქმნიან და ისინი როგორც ადგილობრივ, ისე გლობალურ ბაზრებზე არაინოვაციურ საწარმოებთან შედარებით გაცილებით უფრო კონკურენტუნარიანები არიან. აქედან გამომდინარე მეწარმეობის ზრდის ხელშეწყობა, ინოვაციური და უფრო პროდუქტიული ფირმების განვითარებისა და სწრაფად ზრდისთვის ხელსაყრელი გარემოს შექმნა ქვეყნის წინსვლასთან დაკავშირებული მიზნების ერთ-ერთ მთავარ პრიორიტეტად უნდა იქცეს"- აცხადებენ მსოფლიო ბანკში.
ანგარიშში წარმოდგენილია საქართველოს მიკრო, მცირე და საშუალო ზომის კომპანიებში ჩატარებული კვლევის შედეგები. მასში გაანალიზებულია ის ფაქტორები, რომლებიც ქართულ საწარმოებში სამეწარმეო და ინოვაციური საქმიანობის ზრდას უშლის ხელს. მაგალითად ფინანსებზე წვდომასთან დაკავშირებულ სირთულეები (განსაკუთრებით დამწყები კომპანიებისთვის), არასაკმარისი ცოდნა და ტექნოლოგიის შესახებ ინფორმაციის გადაცემასთან დაკავშირებული პრობლემები, შეზღუდული უნარ-ჩვევები, მეწარმეობისა და ინოვაციის მხარდამჭერი სპეციალური სამთავრობო პროგრამის არ არსებობა და ა.შ. მსოფლიო ბანკის აგნარიშში სამეწარმეო კულტურის ზრდასა და ინოვაციური მეწარმეობის ხელშეწყობაზე ორიენტირებული რეკომენდაციებია მოცემული.
ევროპისა და ცენტრალური აზიის რეგიონის, კონკრეტულად ევროკავშირის წევრი ქვეყნების მსგავსად საქართველოს მთავრობას კერძო სექტორთან ერთად მეწარმეობის ხელშეწყობა ამ ცნების მნიშვნელობის გაზრდით, ზოგადი ბიზნეს გარემოს გაუმჯობესებით, ბაზრებზე წვდომის გაზრდით, საინფორმაციო და დამხმარე უნარ-ჩვევების განვითარებით, ფინანსებზე წვდომის ხელშეწყობით, ინოვაციის მხარდამჭერი სპეციალური ინსტრუმენტების და ინსტიტუტების შექმნით, კომპანიების დონეზე კვლევების და განვითარების სექტორების, ასევე, მათი კომერციალიზაციის გაზრდით და საწარმოების პროდუქტიულობის მხარდაჭერის მიზნით ტექნოლოგიების და ცოდნის გაცვლის ხელშეწყობით შეუძლია.
„სამუშაო ადგილების შექმნა და პროდუქტიულობის ზრდა დღესდღეობით განვითარების მხრივ მსოფლიოში არსებული დღის წესრიგის მთავარი საკითხებია. მსოფლიო ბანკის კვლევის შედეგები, რომლებიც დღეს იქნა წარმოდგენილი, ქართველ მეწარმეებზე მნიშვნელოვან ინფორმაციას მოიცავენ. ანგარიშში მოცემულია კონკრეტული შემთხვევების დეტალური ანალიზი, რომელიც ავსებს ზემოთხსენებულ დასკვნებს და ხაზს უსვამს მეწარმეობის სწრაფი ზრდის განმსაზღვრელ ფაქტორებს"- განაცხადა მსოფლიო ბანკის რეგიონულმა დირექტორმა სამხრეთ კავკასიის ქვეყნებში ჰენრი ქერალიმ.
"საქართველოს ეკონომიკისა და მდგრადი განვითარების სამინისტრო თვლის, რომ მეწარმეობის განვითარებას ქვეყნის ეკონომიკური წინსვლისთვის არსებითი მნიშვნელობა აქვს. გამომდინარე აქედან, გადაწყვეტილი გვაქვს წამოვიწყოთ და მხარდაჭერა აღმოვუჩინოთ ისეთ საქმიანობას, რომელიც შედეგად მოგვცემს დასაქმების მეტ პერსპექტივას, ახალი მცირე და საშუალო ზომის საწარმოების შექმნას და საწყის ეტაპზე მათ მხარდაჭერას. დღევანდელი დისკუსია აღნიშნული მიზნების მისაღწევად მნიშვნელოვანი წინგადადგმული ნაბიჯია, აღნიშნა საქართველოს ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა.
"მაღალი პროდუქტიულობის მიღწევა და სამუშაო ადგილების შექმნა ძალზედ მნიშვნელოვანია მთავრობის საშუალო და გრძელვადიანი მიზნების მისაღწევად. აქედან გამომდინარე სწრაფად მზარდი მეწარმეობისა და ინოვაციური საქმიანობების ხელშეწყობა ამ მიზნების მისაღწევად აუცილებელი ფაქტორებია", განაცხადა მსოფლიო ბანკის ფინანსური და კერძო სექტორის განვითარების სექტორის კოორდინატორმა სამხრეთ კავკასიის რეგიონში ანჟელა პრიგოჟინამ.
„საერთაშორისო სავაჭრო პალატა მეწარმეობას საქართველოში ეკონომიკური ზრდის მამოძრავებელ ძალად განიხილავს. ბიზნეს ასოციაციებს, მათ შორის საქართველოში არსებულ საერთაშორისო სავაჭრო პალატას, მეწარმეობის მხარდაჭერის მხრივ მნიშვნელოვანი როლის შესრულება შეუძლიათ უნარ-ჩვევების განვითარების ხელშეწყობით, მეწარმეებისთვის ინფორმაციაზე გაუმჯობესებული წვდომის უზრუნველყოფით, ჯანსაღი ბიზნეს გარემოს ადვოკატირებით, კერძო და სახელმწიფო სექტორებსა და ასევე, სხვადასხვა დაინტერესებულ მხარეებსა და მთავრობას შორის დიალოგის ხელშეწყობით, რომელიც მეწარმეობის მხარდაჭერის, მცირე და საშუალო საწარმოების განვითარებისა და სამუშაო ადგილების შექმნისკენ იქნება მიმართული", განაცხადა საქართველოს საერთაშორისო სავაჭრო პალატის ვიცე-პრეზიდენტმა ალექსი ალექსიშვილმა.
მრგვალი მაგიდის დროს მთავრობის წარმომადგენელმა ოფიციალურმა პირებმა, ბიზნეს წრეების წარმომადგენლებმა (მათ შორის ბიზნეს და მცირე და საშუალო საწარმოების ასოციაციების და კერძო ფირმების წარმომადგენლებმა), საგანმანათლებლო და კვლევითი ინსტიტუტების, ინოვაციებზე მომუშავე და საინფორმაციო ორგანიზაციების, სამოქალაქო საზოგადოების და დონორი ორგანიზაციების წარმომადგენლებმა საქართველოში მეწარმეობის, მცირე და საშუალო საწარმოების ზრდის მნიშვნელობა განიხილეს და შეთანხმდნენ, რომ ამ სფეროში ყოვლისმომცველი რეფორმებია საჭირო. გარდა ამისა, მათი აზრით, უნდა გაიზარდოს მთავრობის და კერძო სექტორის როლი ინოვაციასა და ცოდნაზე დაფუძნებული ეკონომიკური ზრდისა და სამუშაო ადგილების შექმნის ხელშეწყობის კუთხით.
