ავსტრიულმა კომპანიამ „გებრიუდერ ვაისი" საქართველოში პრემიუმ კლასის ლოგისტიკური ტერმინალი საზეიმოდ გახსნა. სამხრეთ კავკასიის რეგიონში ერთ-ერთი უდიდესი ტერმინალის მშენებლობა 7 თვეში დასრულდა. ინვესტორ კომპანიას პრემიუმ კლასის ლოგისტიკური ცენტრის მშენებლობა საქართველოში 10 მილიონი ევრო დაუჯდა. მიმდინარე წლის ბოლომდე ლოგისტიკური ცენტრში 100 ადამიანის დასაქმებაა დაგეგმილი, რომელთა უდიდესი ნაწილიც ადგილობრივი მოსახლე იქნება.
ტერმინალის გახსნის ოფიციალურ ცერემონიალში მონაწილეობდნენ საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, რეგიონული განვითარებისა და ინფრასტრუქტურის მინისტრი დავით ნარმანია და ავსტრიული კომპანიის აღმასრულებელი დირექტორი ვოლფრამ სინგერ ვაისი. ტერმინალის გახსნას აგრეთვე დაესწრნენ საქართველოს სამთავრობო უწყებებისა და აკრედიტებული დიპლომატიული მისიების წარმომადგენლები. ტერმინალის გახსნის ცერემონიალზე სიტყვით გამოვიდა საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი. მისი განცხადებით, სატრანზიტო დერეფნის ფუნქციის განვითარების მიზნით საქართველოს მთავრობის მიერ ტარდება მნიშვნელოვანი ღონისძიებები, ხორციელდება ინფრასტრუქტურული პროექტები, ვითარდება მეზობელ ქვეყნებთან სატრანსპორტო კავშირები, აქტიურად ვმუშაობთ საერთაშორისო და რეგიონალური მასშტაბის პროექტებსა და პროგრამებზე. აღნიშნული პროცესი ხელს უწყობს საქართველოში უცხოური ინვესტიციების შემოსვლას და ლოგისტიკური სერვისის ამაღლებას, დამატებითი ტვირთნაკადების მოზიდვას და ქვეყნის სატრანზიტო პოტენციალის ზრდას. ტერმინალის მშენებლობა 2012 წლის დეკემბერში დაიწყო. ახალი ლოგისტიკური ცენტრი პასუხობს უსაფრთხოების საერთაშორისო სტანდარტებს, აღჭურვილია უახლესი ტექნოლოგიებითა და დაკომპლექტებულია კვალიფიციური კადრებით. „გებრიუდერ ვაისის" ტერმინალები მსოფლიოს 162 ქვეყანაშია წარმოდგენილი. საქართველოს შერჩევა დადებითი ეკონომიკური კლიმატისა და ხელსაყრელი გეოგრაფიული, გეოეკონომიკური მდებარეობის გათვალისწინებით მოხდა. თანამედროვე ქვეყანაში გამართული ლოგისტიკა და სატრანსპორტო მიმოსვლა ბიზნესის განვითარებისა და ეკონომიკური ზრდის წინაპირობაა. ახალი ობიექტი, რომლის ანალოგიც სამხრეთ კავაშიაში არ არსებობს, კავკასიის რეგიონში სტრატეგიულად მნიშვნელოვანი პლატფორმა გახდება, რაც სომხეთის, აზერბაიჯანისა და აზიის ქვეყნებს ერთმანეთს დააკავშირებს.
