2013 წლის ბოლომდე, უმსხვილესი სწრაფი რესტორნების ქსელი Subway საქართველოში საკუთარ ფილიალს გახსნის. Bloomberg-ის ინფორმაციით, Subway გაფართოებას განაგრძობს და 2014 წლის ბოლომდე ევროპაში დამატებით 1000 რესტორანს განხსნის.
როგორც კომპანია Subway -ს რეგიონული დირექტორი მაიკ შარესტი განმარტავს, ამ დროისათვის Subway ევროპაში 4018 რესტორანს ფლობს.
მისივე განმარტებით, სწრაფი კვების ბაზარი ევროპაში უფრო სწრაფი ტემპით ვითარდება, ვიდრე ჩრდილოეთ ამერიკაში.
ევროპაში ყველაზე დიდ იმედებს Subway დიდი ბრიტანეთის ბაზარზე ამყარებს, სადაც 2015 წლის ბოლომდე Subway-ის 2000 რესტორანი იფუნქციონირებს.
წლის ბოლოსთვის კი Subway ვარაუდობს, რომ ლატვიის, ლიტვის, უკრაინისა და საქართველოს ბაზარზეც იქნება წარმოდგენილი.
აღსანიშნავია, რომ ბოლო პერიოდში ევროპაში Subway-ს მოგება 18 %-ით, 1,57 მლრდ დოლარით გაიზარდა, ხოლო მსოფლიო გაყიდვები კი 9 %-ით, 18,1 მლრდ დოლარითაა გაზრდილი.
მსოფლიოს მასშტაბით Subway 40 000-მდე რესტორანს ფლობს, მაშინ როდესაც მისი მთავარი კონკურენტი McDonald's-ი 35 000 რესტორნის მფლობელია.
აღსანიშნავია, რომ Subway-ის პირველი რესტორანი თბილისში ჭავჭავაძის გამზირზე გაიხსნება.