ტელეკომპანია "მეცხრე არხის" და საინფორმაციო სააგენტო "ინფო 9"-ს საბაზრო ღირებულება 47 მილიონი დოლარია.
როგორც "მეცხრე არხის" გენერალურმა დირექტორმა ლუბა ელიაშვილმა "ჯი-ეიჩ-ენთან" საუბრისას აღნიშნა, მედიასაშუალებების გაყიდვასთან დაკავშირებით, ფინანსისატები მუშაობენ და აღნიშნული ტელეკომპანიის და საინფორმაციო სააგენტოს გასაყიდი ფასი დადგინდება.
”მეცხრე არხის” შექმნასა და ტექნიკურ აღჭურვაში დაიხარჯა 47 მილიონი დოლარი. ეს არის დახარჯული თანხის რაოდენობა, რაც შეეხება მის სარეალიზაციო ფასს, ამ საკითხზე ფინანსისტები მუშაობენ და უახლოეს მომავალში დადგინდება,”- აღნიშნა ლუბა ელიაშვილმა.
მისივე თქმით, ტელეკომპანია "”იბერია ტვ”-სთვის ჩამორთმეული სიხშირის დაბრუნების შემთხვევაში, არხი მაუწყებლობას განაახლებს და ”იბერია ტვ”-ს დამფუძნებლები მზად არიან ტელეკომპანია ”მე-9 არხის” ჟურნალისტებისა და ტექნიკური რესურსის მიღება მოხდეს.
"ბოლო დროს მედიაში გავრცელებულ ინფორმაციასთან დაკავშირებით ტელეკომპანია იბერია ტვ აცხადებს, რომ ამჟამად 2004 წელს იბერიისათვის ჩამორთმეული სამაუწყებლო ლიცენზიის დაბრუნების პროცესი მიმდინარეობს და ტელეკომპანია იბერია ტვ გეგმავს მაუწყებლობის აღდგენას. იბერია ტვ-ს დამფუძნებლები გამოთქვამენ სურვილს და მზადყოფნას, რომ ქართულ სამაუწყებლო სივრცეს დაუბრუნდეს კიდევ ერთი დამოუკიდებელი და კვალიფიციური ჟურნალისტებით დაკომპლექტებული ტელეკომპანია და ამისათვის მზადაა განიხილოს ტელეკომპანია მე-9 არხის ჟურნალისტებისა და ტექნიკური რესურსის მიღების შესაძლებლობა,"- ნათქვამია "იბერის ტვ"-ს მიერ გავრცელებულ განცხადებაში.
