"ჩემთვის ბატონი ხარატიშვილის გადადგომა არის დასანანი და გაუგებარიც, აბსოლუტურად უადგილოა მისი ეს გადაწყვეტილება", - ამის შესახებ საქართველოს იუსტიციის მინისტრმა თეა წულუკიანმა ცენტრალური საარჩევნო კომისიის თავმჯდომარე ზურაბ ხარატიშვილის მიერ თანამდებობიდან გადადგომის თაობაზე მიღებული გადაწყვეტილების კომენტირებისას ისაუბრა.
მინისტრის თქმით, "გამორიცხულია, რომ ზურაბ ხარატიშვილზე საქართველოს ხელიხუფლების მხრიდან რაიმე სახის ზეწოლას ჰქონოდა ადგილი, რადგან მან, როგორც ცენტრალური საარჩევნო კომისიის ხელმძღანელმა, ბოლოსდაბოლოს შეძლო ყველა პოლიტიკურ პარტიასთან თანამშრომლობა და კონსტრუქციული დიალოგი".
"თუკი ამგვარი მნიშვნელოვანი პოზიციის მქონე ადამიანი უნდა გადადგეს, ის უნდა გადადგეს ან მანამდე, მაგალითად, როდესაც მიმდინარეობდა წინა არჩევნები აბსოლუტურად არათავისუფალ გარემოში, ან კიდევ იმის წინა არჩევნები, როდესაც ის ხელმძღვანელობდა ცენტრალურ საარჩევნო კომისიას. ამ წუთში მისი გადადგომა აბსოლუტურად გაუგებარია და მე ვფიქრობ, მან არასწორად შეარჩია მომენტი, თუკი მისთვის მთავარი იყო საქმის ინტერესი, იმიტომ რომ ახლა არ იყო ამის დრო. მე გამოვრიცხავ იმას, რომ მასზე იყო რაიმე ტიპის ზეწოლა. პირიქით, როგორც ჩემთვის ცნობილია, მან, როგორც ცცენტრალური საარჩევნო კომისიის ხელმძღანელმა, ბოლოსდაბოლოს შეძლო ყველა პოლიტიკურ პარტიასთან თანამშრომლობა და კონსტრუქციული დიალოგი. ამიტომ კიდევ ვამბობ, ჩემთვის აბსოლუტურად გაუგებარი და უადგილოა მისი ეს გადაწყვეტილება", - განაცხადა თეა წულუკიანმა.
შეგახსენებთ, რომ საქართველოს ცენტრალური საარჩევნო კომისიის თავმჯდომარემ ზურაბ ხარატიშვილმა ქვეყნის უმაღლეს საკანონმდებლო ორგანოს მისი თანამდებობიდან გათავისუფლების თაობაზე შესაბამისი განცხადებით მიმართა. ხარატიშვილი მისი გადაწყვეტილების მიზეზებზე 15 აგვისტოს ისაუბრებს.