"ალიანსი საქართველოსთვის" წარმომადგენლის, "ახალი მემარჯვენეების" წევრის მანანა ნაჭყებიას შეფასებით, "ირაკლი ალასანიამ თავისი შეცდომა, რაც მან პრაიმერის ინიციატორ პარტიებთან კონსულტაციებით გადადგა, დაინახა".
"ირაკლი ალასანია, სარისკო ნაბიჯი გადადგა, როცა თბილისის მერობის ერთიანი კანდიდატის გამოსავლენად პრაიმერის ინიციატორ პარტიებთან ერთად ჩაერთო კონსულტაციებში და სცადა, რომ ამ გზით ოპოზიციური ერთობისთვის მიეღწია, თუმცა დაინახა თავისი შეცდომა, დაინახა, რომ "ალიანსში" შემავალი პოლიტიკური სუბიექტები მას სავსებით სწორად მიანიშნებდნენ იმ საფრთხეზე, რომ ეს კონსულტაციები და საერთოდ, პრაიმერის იდეა სახელისუფლებო ხაფანგი იყო. სწორედ ამან განაპირობა მისი პოზიციის შეცვლა", - განუცხადა მანანა ნაჭყებიამ "ჯი-ეიჩ-ენს".
მისივე შეფასებით, თავისთავად ცუდი არაფერი იყო იმაში, რომ ირაკლი ალანიამ ერთობის მიღწევის სხვა გზებიც მოსინჯა.
"მთელ ამ ორომტრიალში და იწილო-ბიწილოში მაინც საზოგადოებამ გაიმარჯვა და დაინახა, რომ ხელისუფლების მხრიდან კიდევ ერთხელ ჰქონდა ადგილი "ალიანსის" იმ რელსებიდან გადაყვანის მცდელობას, რომელზეც ის მიდის, თუმცა მადლობა ღმერთს, ირაკლი ალასანია მიხვდა, რომ ეს ყველაფერი იყო ხაფანგი და გაეცალა ამ პროცესებს. ეს თემა უკვე ამოწურულია. ახლა დროა გამოვაცხადოთ მზადყოფნა იმისთვის, რომ არჩევნებში გამარჯვებას მივაღწიოთ", - განმარტა ნაჭყებიამ.
შეგახსენებთ, რომ მერობის ერთიანი ოპოზიციური კანდიდატების გამოსავლენად პრაიმერი აღარ გაიმართება. პრაიმერის ინიციატორი პარტიების ლიდერებმა ახალი გადაწყვეტილების შესახებ ოფიციალურად დღეს განაცხადეს და განმარტეს, რომ მერობის კანდიდატების გამოვლენა სოციოლოგიური გამოკითხვით მოხდება.
აღსანიშნავია, რომ აღნიშნულ გადაწყვეტილებას წინ უძღვოდა პრაიმერში მონაწილეობის მიღებაზე უარის თქმასთან დაკავშირებით პრაიმერის ინიციატორ პარტიებთან ერთად შესაბამის კონსულტაციებში მონაწილე, "ალიანსი საქართველოსთვის" ერთი კვირით გამიჯნული ლიდერის - ირაკლი ალასანიას გადაწყვეტილება.
