"ალიანსი საქართველოსთვის" წარმომადგენლის სოზარ სუბარის შეფასებით, ირაკლი ალასანიას მცდელობა, შეექმნა დიდი ოპოზიციური გაერთიანება უშედეგოდ დასრულდა.
"ირაკლი ალასანიას მცდელობას, მოეხდინა ოპოზიციის უფრო დიდი გაერთიანება, შედეგი არ მოჰყვა, რადგან გარკვეუმა ძალებმა ვერ მოახერხეს გამიჯვნოდნენ ჩვენთვის მიუღებელ პოლიტიკურ ძალას - ზურაბ ნოღაიდელს", - აცხადებს სოზარ სუბარი ირაკლი ალასანიას "ალიანსში" დაბრუნებაზე კომენტირებისას.
მისივე განმარტებით, "ალიანსი საქართველოსთვის" თბილისის მერის არჩევნებში "ერთიანი გუნდით" წარსდგება და მზადაა აწარმოოს დიალოგი ყველასთან, "ვისაც სურს ამ გუნდს შეუერთდეს".
შეგახსენებთ, რომ ირაკლი ალასანია "ალიანსში" ბრუნდება.
როგორც ალასანიამ ჟურნალისტებს განუცხადა, ის თბილისის მერის არჩევნებში კვლავ "ალიანსი საქართველოსთვის" კანდიდატი იქნება.
მისივე თქმით, პრაიმერში მონაწილეობას არ მიიღებს, თუმცა თვითმმართველობის არჩევნებში მონაწილე პარტიებთან კონსულტაციებს გააგრძელებს.
როგორც ცნობილია, გასულ კვირას ირაკლი ალასანია თანაალიანსელ პარტიებს გაემიჯნა და თბილისის მერობის ერთიანი კანდიდატის გამოსავლენად მიმდინარე კონსულტაციებში "ახლებისა" და "რესპუბლიკელებისთვის" მიუღებელ ზურაბ ნოღაიდელთან ერთად ჩაერთო.
