აჭარის მთავრობა ხელვაჩაურის სამრეწველო ზონის განვითარებაზე აქტიურად მუშაობს. რეგიონის ხელისუფლება ინვესტორებს ზონით დაინტერესებისკენ მოუწოდებს.მორიგი ასეთი შეხვედრა აჭარის მთავრობამ, რეგიონის სავაჭრო-სამრეწველო პალატასთან ერთად თურქ ინვესტორებთან უკვე გამართა.
თავის მხრივ, სამრეწველო ზონის განვითარების საპროექტო წინადადება ქალაქ ბათუმში, ხელვაჩაურის სამრეწველო ზონის განვითარებას ითვალისწინებს. ასათვისებელი მიწის ნაკვეთების საინვესტიციო პოტენციალის გაზრდის მიზნით, დაგეგმილი ინფრასტრუქტურული პროექტის განხორციელების საერთო ღირებულება 33,3 მილიონ ლარს შეადგენს. პროექტით გათვალისწინებული სამრეწველო ზონის კონკურენტუნარიანობას მისი ხელსაყრელი მდებარეობა განაპირობებს. სამრეწველო ზონა ბათუმის პორტიდან 7 კილომეტრით, აეროპორტიდან 500 მეტრით, სარფის საბაჟოდან 10 კილომეტრით, სარკინიგზო ჩიხებიდან კი - 4 და 7 კილომეტრით არის დაშორებული. საპროექტო ტერიტორიას ბათუმის გაფორმების ეკონომიკური ზონა ესაზღვრება.როგორც აჭარის ფინანსთა და ეკონომიკის სამინისტროში განმარტავენ, ხელვაჩაურის სამრეწველო ზონა უნდა იყოს მრავალდარგობრივი, ძირითადად ორიენტირებული იმპორტშემცვლელი და საექსპორტო პროდუქციის მწარმოებელი საწარმოების შექმნაზე.
აჭარის ფინანსთა და ეკონომიკის მინისტრი დავით ბალაძე ტრაპზონის სავაჭრო-სამრეწველო პალატის პრეზიდენტ სუათ ჰაჯიბ სალიოღლუს, ართვინის სავაჭრო-სამრეწველო პალატის თავმჯდომარეს ქურთულ ოზელსა და თურქეთის აღმოსავლეთ შავი-ზღვისპირეთში განვითარების სააგენტოს თავმჯდომარეს ჩეთინ ოქტაი ქალდირიმს შეხვდა. ორმხრივ შეხვედრას, ქართული მხრიდან, აჭარის სავაჭრო-სამრეწველო პალატის თავმჯდომარე თამაზ შავაძე და მინისტრის მოადგილე ბესიკ ბოლქვაძე ესწრებოდნენ. შეხვედრის მთავარი თემა ხელვაჩაურის სამრეწველო ზონა იყო. შეხვედრაზე საუბარი აღნიშნულ ტერიტორიაზე თურქეთის მხრიდან, ინვესტიციების შესაძლო განხორციელებას შეეხო. მხარეებმა ორმხრივი თანამშრომლობის სურვილი გამოთქვეს.