საქართველოს ბიზნეს ასოციაციაში შეშფოთებას გამოთქვამენ იმ ინიციატივის გამო, რომელიც პარლამენტში დეპუტატთა ჯგუფის მიერაა ინიცირებული და ითვალისწინებს კრედიტორების სასარგებლოდ იპოთეკით დატვირთული ქონების რეალიზაციაზე 2014 წლის 1 თებერვლამდე მორატორიუმის გამოცხადებას.
როგორც ბიზნეს ასოციაციაში აცხადებენ, აღნიშნული ინიციატივა არა მხოლოდ საბანკო- საფინანსო სექტორს შეუქმნის უზარმაზარ პრობლემებს, არამედ სერიოზულ დარტყმას მიაყენებს უძრავი ქონების ბაზარს, მკვეთრად შეამცირებს ქართული საბანკო სისტემის მიმართ საერთაშორისო ფინანსური ინსტიტუტების ნდობას, გააუარესებს საინვესტიციო გარემოს და რაც ყველაზე მთავარია ვერ მოაგვარებს იმ სოციალურ პრობლემებს, რომელთა დასაძლევადაც ერთი შეხედვით აღნიშნული კანონპროექტი იქნა ინიცირებული.
როგორც კანონპროექტის განმარტებით ბარათშია მითითებული, მოსახლეობის დიდ ნაწილს არ შეუძლია იპოთეკური სესხების დაფარვა და გამოსახლების საფრთხის წინაშეა, რაც ცალსახად არასწორი ინფორმაციაა. ჩვენს ხელთ არსებული ინფორმაციით, საქართველოს მასშტაბით ორი უმსხვილესი ბანკის მონაცემებზე დაყრდნობით დაბეჯითებით შეგვიძლია ვთქვათ, რომ წლევანდელი წლის განმავლობაში ადგილი ჰქონდა მხოლოდ 30-მდე გამოსახლების ფაქტს, მაშინ როდესაც ამ ორი ბანკის მიერ გაცემული იპოთეკური სესხების რაოდენობა 35.000 ერთეულს აღემატება;
"თავად კანონპროექტში არაფერია ნათქვამი იმაზე, თუ რა მოხდება მორატორიუმის ვადის ამოწურვის შემდგომ, ან მორატორიუმის მოქმედების განმავლობაში ვინ და როგორ მოაგვარებს ამ პრობლემას, ვინ გადაიხდის საკრედიტო ორგანიზაციების მიმართ არსებულ დავალიანებებს.
ვფიქრობთ, კანონპროექტის მომზადების პროცესში სათანადოდ არ ყოფილა გააზრებული ის ნეგატიური გავლენა, რაც არათუ ამ კანონპროექტის მიღებას შეიძლება მოჰყვეს, არამედ რაც გამოიწვია თუნდაც მის შესახებ ინფორმაციის გაჟღერებამაც კი; საკრედიტო ორგანიზაციებს უკვე შეექმნათ პრობლემები მათ მიერ გაცემულ იპოთეკური სესხებზე პერიოდული გადახდების მიღებასთან დაკავშირებით. ხდება კეთილსინდისიერი გადამხდელების დემოტივაციაც" ნათქვამია ასოციაციის მიერ გავრცელებულ განცხადებაში.
მათივე ინფორმაციით, ბანკებმა და სხვა საკრედიტო ორგანიზაციებმა უკვე დაიწყეს თავიანთი საკრედიტო პოლიტიკის გადახედვა, რაც მომავალში აუცილებლად გამოიწვევს არა მხოლოდ იპოთეკური, არამედ სხვა ტიპის სესხების გაცემის შემცირებას და გაძვირებას. აღნიშნულს აუცილებლად მოყვება ამ ბაზრის „ჩრდილში" გადანაცვლება, ანუ ისარგებლებენ ისევ კერძო მევახშეები, რომლებიც სხვადასხვა ფორმის თვალთმაქცური გარიგებების მეშვეობით, სესხის გაცემის წინაპირობის სახით წინასწარ, პირდაპირ მიიღებენ საკუთრებაში მოვალის ქონებას, რაც კიდევ უფრო დაამძიმებს სოციალურ ფონს, სახელმწიფო კი ამას წინ ვერ აღუდგება.
„ინიციატივა მნიშვნელოვან პრობლემას შეუქმნის უძრავი ქონების ბაზარსაც, რადგან ერთის მხრივ მომხმარებელი, რომელსაც სურს იპოთეკური სესხის მეშვეობით შეიძინოს უძრავი ქონება, პრაქტიკულად ვეღარ შეძლებს ამის გაკეთებას და ბაზარზე მოთხოვნა მკვეთრად შემცირდება, მეორეს მხრივ კი უკვე საკურებაში არსებული უძრავი ქონება, როგორც აქტივი პრაქტიკულად გამოუსადეგარი გახდება სესხის უზრუნველსაყოფად.
რაც ყველაზე მნიშვნელოვანია - კანონპროექტი მნიშვნელოვნად აზიანებს საქართველოს საბანკო სისტემის მიმართ ნდობას, რადგან რისკის ქვეშ დგება ბანკების ლიკვიდურობა, სისტემის მდგრადობა, საერთაშორისო საფინანსო ინსტიტუტების მიერ კანონპროექტით გათვალისწინებული შედეგი შეიძლება განხილულ იქნეს დეფოლტის პირდაპირ შემთხვევად (არაუზრუნველყოფილ სესხი) და ქმნის რისკს - გამოთხოვილი იქნას უკვე გაცემული ფინანსური რესურსი.
გვსურს ჩვენი გულისტკივილი გამოვთქვათ იმასთან დაკავშირებით, რომ ზოგიერთ შემთხვევაში მსგავსი სახის ინიციატივები ჟღერდება ისე, რომ არათუ ექსპერტებთან, ბიზნესთან, დაინტერესებულ მხარეებთან იმართება წინასწარი კონსულტაციები, არამედ თავად მთავრობის ეკონომიკურ გუნდთანაც კი არ ხდება წინასწარ თუნდაც ინფორმაციის გაცვლა.
მოცემულ შემთხვევაში მნიშვნელოვნად მიგვაჩნია იმაზე ხაზგასმაც, რომ საქართველოს იუსტიციის სამინისტროში უკვე მიმდინარეობს სააღსრულებო წარმოებათა შესახებ კანონში და სამოქალაქო კოდექსში ცვლილებების პროექტზე მუშაობა, სადაც ჩართულია დაინტერესებული მხარეების, ექსპერტების, ბიზნესის წარმომადგენლების ფართო სპექტრი და პარალელური ინიციატივების განხილვა საკანონმდებლო ორგანოში მხოლოდ გაუგებრობის და არაკოორდინირებულობის განცდას ქმნის ბიზნეს საზოგადოებაში" აცხადებენ ბიზნეს ასოციაციაში.
ბიზნეს გაერთიანება აცხადებს, რომ ისინი კარგად აცნობიერებენ იმ სოციალური პრობლემების არსს, რომლებიც გამოწვევაა არა მხოლოდ საკანონმდებლო და აღმასრულებელი ხელისუფლებისათვის, არამედ ბიზნესისათვისაც, თუმცა ბზინესის აზრით მსგავსი ინიციატივებით საკითხი არ მოგვარდება.
„პრობლემა ის კი არაა, რომ ადამიანები გადაუხდელი ვალების გამო საცხოვრებელს კარგავენ, პრობლემის სათავე მდგომარეობს იმ გარემოებებში, რაც ადამიანებს აიძულებს რისკის ქვეშ დააყენონ თავიანთი საკუთრება და აიღონ სესხი, რომლის დაფარვასაც ვერ შეძლებენ;
ბიზნესს შეუძლია საკანონმდებლო და აღმასრულებელ ხელისუფლებასთან ერთად დაგეგმოს განვითარების გზები, გახდეს მეტად კონკურენტუნარიანი, აწარმოოს მეტი და მეტი სარგებელი შექმნას სახელმწიფოსათვის, ხალხისათვის. ბიზნესი ვალდებულია გადაიხადოს გადასახადები, რომელთა მეშვეობითაც შემდგომში სახელმწიფო აფინანსებს სოციალურ პაკეტებს, მაგრამ ჩვენი აზრით მეტის მოთხოვნა ბიზნესისათვის, წახალისება იმისა, რომ ადამიანებმა არ შეასრულონ ნაკისრი ვალდებულებები დაუშვებელია, ისევე როგორც დაუშვებელია გადასახადების არგადახდა.
ყოველივე ზემოთქმულიდან გამომდინარე, ბიზნეს ასოციაცია იმედს გამოთქვამს, რომ საქართველოს საკანონმდებლო ორგანო შეაჩერებს წარმოდგენილი საკანონმდებლო ინიციატივის განხილვას და გაითვალისწინებს დაინტერესებული მხარეების, ექსპერტების მოსაზრებებს, შენიშვნებსა და მოსაზრებებს."- აცხადებენ ბიზნეს ასოციაციაში.