RP22R58 ჯიშის ხორბლის მოსავლის აღება კომპანია „კარტლისმა" მარნეულის რაიონის სოფელ ბაიდარში გუშინ დაიწყო და როგორც „კარტლისის" ხელმძღვანელი რობერტ რევია აღნიშნავს, 1 ჰექტარზე 9 ტონა ხორბალი აიღეს, თუმც საშუალო გათვლებით, მკის დასრულების შემდეგ 1 ჰექტარზე დაახლოებით 7-8 ტონა ხორბლის მოსავალს აიღებენ, რომელსაც შემდგომ გასაყიდად ბაზარზე გაიტანენ. წელს, RP22R58 ჯიშის ხორბალი კომპანიამ მარნეულში 55 ჰექტარზე, ხოლო დმანისის რაიონის სოფელ შინდლარში 25 ჰექტარზე დათესა. კომპანიაში აცხადებენ, რომ ორივე ადგილას ხორბლის მოსავალი ძალიან მაღალია. ყანები „კარტლისის" ტექნოლოგიითაა მოვლილი, რაც გულისხმობს ჯიშის სწორ შერჩევას, ნიადაგის შესაბამის დამუშავებას, სასუქებისა და ჰერბიციდის სწორ შერჩევასა და გამოყენებას, სასუქებით გამოკვების სქემის დამუშავებას და ა.შ.

„ეს ხორბალი გასული წლის 15 ოქტომბერს დავთესეთ. ეს ახალი ჯიში, ჩვენთან იტალიიდან შემოდის და იტალიური წარმოებისაა. თესვამ კარგი შედეგები გვაჩვენა მძიმე კლიმატურ პირობებშიც კი. ამ ჯიშს აქვს მოსავლიანობის ძალიან მაღალი პოტენციალი და შესაბამისი მოვლის პირობებში შეუძლია მოგვცეს 1 ჰექტარზე 7-8 ტონა ხორბალი, ხოლო იმ ჯიშის სათესლე ხორბლით, რასაც საქართველოში ამჟამად თესავენ, ჰექტარზე 2-3 ტონა ხორბალი მოდის.
საქართველოში ხორბლის ხარისხიანი სათესლე მასალა პრობლემა იყო. ის სათესლე მასალა, რომელიც ამ დროისათვის ბაზარზე ტრიალებს არის ძველი და მას საკუთარი თვისებები დაკარგული აქვს. ბაზარზე რაც სათესლე მასალა შემოდის მისი ფასი ძალიან მაღალია. ეს სათესლე მასალა არის ძვირი, 1 კგ სათესლე მასალის ღირებულება 1,1 ევროს შეადგენს, მაგრამ ფასთან მიმართებაში მისი ხარისხიც შესაბამისია. ეს არ არის ჰიბრიდი და მისი გამოყენება სათესლე მასალად მომავალ წელსაც შეიძლება. ხარისხიანი სათესლე მასალა ქვეყნისთვის და ზოგადად წარმოებისთვის ძალიან კარგია.
ჩვენ სათესლე მასალას პირდაპირ არ ვყიდით, ჯერ მის გამოცდას ვაწარმოებთ. შარშან ხორბალი ქვეყნის 7 რაიონში, ჯამში 150 ჰექტარზე დავთესეთ. ამ გამოცდას კი თვალს ადევნებდა და აკვირდებოდა, აკადემიკოსი პეტრე ნასყიდაშვილი, რომელმაც შარშან დაკვირვების შემდგომ ხორბალს დადებითი დახასიათება მისცა"- აცხადებს კომპანია „კარტლისი"-ს დირექტორი რობერტ რევია.
რობერტ რევიას განმარტებით, კომპანია 1 კგ ხორბალს დაახლოებით 0,4 ლარად გაყიდის.
რაც შეეხება სათესლე მასალის ფასებს, როგორც რობერტ რევია აცხადებს, ეს არის უმაღლესი ხარისხის სათესლე მასალა და შესაბამისად, ფასიც აქვს საკმაოდ მაღალი.
„2013 წლის ფასები ჯერ არ არის ცნობილი, რადგან არის დამოკიდებული წლევანდელ მოსავალზე, რომლის აღება მიმდინარეობს ამ წუთებში. კომპანია „პიონერი" ხორბლის თესლის ახალ ფასებს 30 ივლისს გამოაქვეყნებს. თუმცა შეგვიძლია ვთქვათ, რომ სავარაუდო ფასი 1 რეპროდუქციის სათესლე ხორბალზე იქნება 1,1 ევრო/კგ," - აღნიშნავს რობერტ რევია.
კომპანიის მენეჯმენტის ცნობით, აღნიშნული ჯიშის ხორბალი, გასულ წელს „კარტლისთან" ერთად ფერმერებმა ბოლნისის, მარნეულის, გორის, დმანისის, სიღნაღის და დედოფლისწყაროს რაიონებში სულ 1000 ჰექტარამდე ტერიტორიაზე დათესეს.
ის ფერმერები, რომლებმაც „კარტლისის"- გან RP22R58 ჯიშის ხორბალი შეიძინეს კმაყოფილნი არიან და აცხადებენ, რომ მოსავალი საკმაოდ რეკორდულა და რაც ყველაზე მნიშვნელოვანია ხორბლის ხარისხიც საკმაოდ მაღალია.
თავად აკადემიკოსი პეტრე ნასყიდაშვილი, რომელიც „კარტლისის" მიერ შემოტანილ ხორბლის თესლს და შემდგომ მის თესვასა და მოწევას აკვირდებოდა განმარტავს, რომ იტალიური წარმოების „პიონერის" სათესლე ხორბლის ახალი ჯიში, საცდელად საქართველოში უკვე მეორე წელია ითესება და შედეგიც საკმაოდ დამაკმაყოფილებელია.
კომპანია „კარტლის"-ის მენეჯმენტის ინფორმაციით, შესადარებლად, აღნიშნული ჯიშის ხორბლით დათესილი ყანების გვერდით ყველგან ეთესა საქართველოში ფართოდ გავრცელებული ჯიში „ბეზოსტაია-1" (საქართველოში ცნობილი როგორც „უფხო პირველი"). აღნიშნული ჯიში გამოიცადა 150 ჰექტარზე საქართველოს ტრადიციული მეხორბლეობის ყველა ზონაში. ჯიშმა- RP22R58 ყველგან აჯობა სტანდარტს „ბეზოსტაია-1"-ს და ასევე აჩვენა უფრო მაღალი მოსავლები მეზობელ ფართობებთან შედარებით.