საქართველოს პრეზიდენტმა მიხეილ სააკაშვილმა საქართველოს პარლამენტში წლიური მოხსენებით გამოსვლისას ჯანდაცვის სექტორში არსებულ პრობლემებზე ისაუბრა და განაცხადა, რომ ახალი საავადმყოფოების მშენებლობაში კერძო სექტორთან ერთად ერთ-ერთი ძირითადი ინვესტორი სახელმწიფო იქნება.
მისი განცხადებით, 2008-09 წლებმა მნიშვნელოვნად შეაფერხეს ის გეგმები, რომლებიც გვქონდა ჯანდაცვის სექტორის განვითარების მიმართულებით.
"ასი ახალი საავადმყოფოს პროექტი ძალიან დაზარალდა. ეს პროექტი სიცოცხლისუნარიანი იყო ომამდელი და მსოფლიო ეკონომიკური კრიზისის არსებული ეკონომიკური რეალობის პირობებში. კრიზისმა და ომმა ეს ყველაფერი გამორიცხა. არადა ქართული ჯანდაცვის სისტემა განვითარებას და გაჯანსაღებას საჭიროებს. ვერ დაველოდებით შემდგომი ეკონომიკური ბუმის პერიოდს და მანმადე ვერ გადავდებთ ჩვენი მოქალაქეების ჯანდაცვის მაღალ დონეზე უზრუნველყოფას", _ განაცხადა სააკაშვილმა და დასძინა, რომ მთავრობამ შეიმუშავა ახალი პროგრამა, რომლის მიხედვით ახალი საავადმყოფოების მშენებლობაში კერძო სექტორთან ერთად ერთ-ერთი ძირითადი ინვესტორი იქნება სახელმწიფო სექტორი.
"პირველ ეტაპზე თბილისის მასშტაბით დაიწყევბა ახალი, მსოფლიო სტანდარტების საავადმყოფოების მშენებლობა. სახელმწიფო ააშენებს და მათ შემდეგ მფლობელობაში და მართვაში გადასცემს არსებული საავადმყოფოების კოლექტივებს", _ განაცხადა მან.
ქვეყნის პირველმა პირმა საკანონმდებლო ორგანოში დეპუტატებს წლიური მოხსენებით მიმართა. პრეზიდენტის გამოსვლას სრულიად საქართველოს კათალიკოს-პატრიარქი, მთავრობის წევრები, საერთაშორისო ორგანიზაციების წარმომადგენლები და თბილისში ვიზიტით მყოფი რუსი ჟურნალისტები ესწრებოდნენ.
