რეინტეგრაციის მინისტრს პაატა ზაქარეიშვილს საქართველოს მიერ აფხაზეთისა და ცხინვალის რეგიონის ე.წ. პასპორტების ვალიდურობის აღიარების შესახებ პასუხი არ აქვს. საინფორმაციო სააგენტო „ჯი-ეიჩ-ენი" დაუკავშირდა მინისტრ ზაქარეიშვილს, რომელსაც აღნიშნულ კითხვაზე პასუხი არ აქვს.
„ჯი-ეიჩ-ენის" შეკითხვაზე აღიარა თუ არა საქართველოს ხელისუფლებამ აფხაზეთისა და ცხინვალის რეგიონის ე.წ. პასპორტების ვალიდურობა, ზაქარეიშვილი პასუხობს: „როგორ გიპასუხოთ, კონფერენციაზე ვარ, დაუკავშირდით პრესსამსახურს, ახლახანს ველაპარაკე, მირჩევნია ამ ფორმით ვითანამშრომლოთ პრესასთან". ამ პასუხის შემდეგ მინისტრმა ტელეფონი გამორთო, თუმცა პარალელურ რეჟიმში ტელეფონი(ორი) გამორთო მისმა პრესამსახურმაც.
შეგახსენებთ, რომ საქართველოს ხელისუფლებამ აფხაზეთისა და ცხინვალის რეგიონის არ აღიარებული რესპუბლიკების მიერ გაცემული პასპორტების ვალიდურობა აღიარა. ამის შესახებ ინფორმაციას დეპუტატი ჩიორა თაქთაქიშვილი ავრცელებს. თაქთაქიშვილი აღნიშნავს, რომ ინფორმაცია რუსეთ-საქართველოს ომის შედეგებთან დაკავშირებით ევროპის საბჭოს მონიტორინგის კომიტეტის 5 მომხსენებლის სპეციალური ანგარიშიდან გახმაურდა.
"მან ასევე გააუქმა წესები, რომელიც ართულებდა აფხაზეთის და სამხრეთ ოსეთის მიერ გაცემული ეგრეთ წოდებული "პასპორტებით" გადაადგილებას საქართველოში და აღიარა ისინი ვალიდურ პირადობის დამადასტურებელ დოკუმენტებად თბილისის მიერ კონტროლირებულ ტერიტორიებზე" - ნათქვამია ევროსაბჭოს მომხსენებლების განცხადებაში.
დოკუმენტში ასევე მითითებულია, რომ საქართველოს ხელისუფლება აფხაზეთის გავლით სარკინიგზო მიმოსვლის აღდგენაზე მუშაობს. "იმისთვის, რომ ხელი შეუწყოს ვაჭრობას და გაიზარდოს გადაადგილების თავისუფლება, ახალი მთავრობა აცხადებს, რომ მისი სურვილია განიხილოს სარგინიგზო მიმოსვლის აღდგენის საკითხი თბილისის მიერ კონტროლირებულ ტერიტორიასა და სოხუმის მიერ კონტროლირებულ ტერიტორიას შორის არსებული ადმინისტრაციული საზღვრის გავლით".
