ბრიუსელში ევროპის პარლამენტში ევროპის სახალხო პარტიის ორგანიზებით კონფერენცია: ,,საით მიდის საქართველო?" გაიმართა. კონფერენციას მომხსენებლის რანგში ეროვნული უშიშროების საბჭოს მდივანი გიგა ბოკერია, თბილისის მერი გიგი უგულავა და უმცირესობის ლიდერი დავით ბაქრაძე დაესწრნენ. სიტყვით გამოსვლისას თბილისსი მერმა 1 ოქტომბრის შემდეგ, ადგილობრივ თვითმმარველობებში შექმნილ ვითარებაზე ისაუბრა.
"ჩემი ძირითადი აქცენტი გაკეთებული იყო თვითმართველობის პრობლემებზე. პირველი ოქტომბრის მერე 67 მოქმედი თვითმართველობიდან 45-ში მოხდა სხვადასხვა ძალადობრივი მეთოდებით შეცვლა და საკრებულოს წევრების გადაბირება, რაც ბუნებრივ შეშფოთებას იწვევს ჩვენ ევროპელ მეგობრებში. იმიტომ, რომ ადგილობრივი თვითმართველობა არის საფუძველო დემოკრატიის და საზომი იმისა, თუ რამდენად აქვს საშუალება ადგილობრივ თვითმართველობას თავისი ფუნქციები შეასრულოს. სწორედ ეს არის ერთ-ერთი მთავარი საზომი დემოკრატიისა და ვფიქრობ, რომ ამ შემთხვევაში ჩვენ, ისევე, როგორც ოპოზიციის წარმომადგენლებმა, ადგილობრივი თვითმართველობის წარმომადგენლებმა და ცენტრალურმა მთავრობამ, ერთობლივად უნდა მივაქციოთ ამას ყურადღება, განსაკუთრებით ვილნიუსის სამიტის წინ, იმიტომ, რომ ყოველი ესეთი შემთხვევა, როგორიც იყო რუსთავში, როგორიც იყო სამტრედიაში, ძალიან ნეგატიურად აისახება ჩვენი ქვეყნის იმიჯზე. ეს არ არის პოლიტიკური საკითხი პარტიებს შორის განსახილველი. ეს პირველ რიგში მნიშვნელოვანია სწორედ ქვეყნისთვის და ამიტომ მეტი ყურადღებაა მისაქცევი ამ მიმართულებით", - განაცხადა გიგი უგულავამ.
.
