დღეს ისრაელის პრემიერ-მინისტრის ოფისში გაიმართა ბიძინა ივანიშვილის შეხვედრა ბენიამინ ნეთანიაჰუსთან. შეხვედრის დაწყებამდე პრემიერ-მინისტრებმა მედიის წარმომადგენლებისთვის კომენტარი გააკეთეს. როგორც საქართველოს პრემიერ-მინისტრმა აღნიშნა, ის მოხარულია, რომ ისრაელში მისი ვიზიტი შედგა.
"მოხარული ვარ, რომ ვიმყოფები ოფიციალური ვიზიტით პარტნიორ ქვეყანაში, რომელთანაც გვაკავშირებს 26 საუკუნოვანი მეგობრობა. ახლა საჭიროა ამ მეგობრობის რეალიზაცია და ურთიერთობების კიდევ უფრო გაღრმავება. ისრაელს დიდი გამოცდილება გააჩნია სოფლის მეურნეობის სფეროში, ჩვენ უნდა გამოვიყენოთ ეს გამოცდილება. მშვიდობის შენარჩუნების და ტერორიზმთან ბრძოლის თემა დღეს ძალიან აქტუალურია. ამას გარდა მოლაპარაკებებს გავაგრძელებთ ეკონომიკური და უსაფრთხოების საკითხების გარშემო",-განაცხადა საქართველოს პრემიერმა.
თავის მხრივ ისრაელის პრემიერ-მინისტრმა მადლობა გადაუხადა ბიძინა ივანიშვილს სტუმრობისთვის და იმედი გამოთქვა, რომ ორ ქვეყანას შორის ურთიერთობები კიდევ უფრო განმტკიცდება.
