2013 წლის 21 ივნისს, საქართველოს საგარეო საქმეთა მინისტრის პირველმა მოადგილემ დავით ზალკალიანმა გამართა შეხვედრები ეუთო-ს გენერალურ მდივანთან ლამბერტო ზანიერთან და ეუთო-ს კონფლიქტების პრევენციის ცენტრის დირექტორთან ადამ კობიერაცკისთან.
შეხვედრებზე მხარეებმა განიხილეს რუსეთ-საქართველოს კონფლიქტის მშვიდობიან მოგვარებაში ეუთო-ს როლის გაძლიერების კონკრეტული გზები და პერსპექტივები. საქართველოს საგარეო საქმეთა მინისტრის პირველმა მოადგილემ ეუთო-ს გენერალურ მდივანსა და კონფლიქტების პრევენციის ცენტრის დირექტორს დეტალური ინფორმაცია მიაწოდა საქართველოს ოკუპირებულ რეგიონებში უსაფრთხოებისა და ადამიანის უფლებების კუთხით არსებულ ვითარებაზე. დავით ზალკალიანმა განსაკუთრებული აქცენტი გააკეთა უკანასკნელ პერიოდში რუსეთის საოკუპაციო ძალების არალეგალურ საქმიანობაზე ცხინვალისა და აფხაზეთის რეგიონებში, საოკუპაციო ხაზის გასწვრივ მათ მიერ მავთულხლართების გავლებისა და ხელოვნური მიწათხრილების მოწყობის ფაქტებზე. შეხვედრის ფარგლებში მხარეებმა ყურადღება დაუთმეს ჟენევის საერთაშორისო მოლაპარაკებებთან დაკავშირებულ საკითხებს.
მასალის გამოყენების პირობები