,,არასამთავრობო სექტორის წარმომადგენლებთან, მათ შორის თამარ გურჩიანთან საკმაოდ კარგად ვითანამშრომლეთ", _განაცხადა ,,ჯი-ეიჩ-ენთან" საუბარში პარლამენტის ადამიანის უფლებების დაცვისა და სამოქალაქო ინტეგრაციის კომიტეტის თავმჯდომარემ თამარ გურჩიანის ,,პოლიტმეტრში" გაკეთებული განცხადების კომენტირებისას.
,,ცოტა ხნის წინ დავასრულეთ ოთხსაათიანი შეხვედრა იმ არასამთავრობო სექტორის წარმომადგენლებთან, რომლებიც არ იწონებდნენ კომიტეტის მიერ მომზადებულ პროექტს, მათ შორის, თამარ გურჩიანი იყო. იგი აქტიურად ჩართული იყო დღევანდელ სამუშაო ფორმატში. მე მას ვუთხარი, რომ მისი მხრიდან ეს შეფასება მთლად კორექტული არ იყო და მან მითხრა, რომ პიროვნულად შეურაცხყოფა არავისთვის მიუყენებია და დადასტურა ჩემდამი პატივისცემა. მან აღნიშნა, რომ 17 მაისის მოვლენებისადმი შემუშავებულ პროექტთან დაკავშირებით გამოხატა ასეთი მწვავე დამოკიდებულება და არ პიროვნებებისადმი", _განაცხადა ,,ჯი-ეიჩ-ენთან" საუბარში ბესელიამ.
მისივე განცადებით, 17 მაისის მოვლენებთან დაკავშირებით შემუშავებული პროექტი არასამთავრობო სექტორთან შეხვედრისას მუხლობრივად განიხილეს და მნიშვნელოვან საკითხებზე შეჯერება მოახერხეს.
,,რამდენიმე საკითხია, რომელზეც განსხვავებული მოსაზრებები დაგვრჩა. ესაა, შსს მოქმედების შეფასება, ასევე რელიგიის თავისუფლებასთან დაკავშირებით რამდენიმე ფორმულირება. ჩვენ გვექნება კიდევ, მინიმუმ, ერთი შეხვედრა და შესაძლებელია ყველაფერში ერთმანეთს ვერ დავეთანხმოთ, მაგრამ ძირითად ნაწილებში რაც ეხება ადამიანის ფუნდამენტურ უფლებებს, როგორიცაა გამოხატვისა და შეკრების უფლება, ძალადობის დაგმობა და ხელისუფლების ვალდებულება დაიცვას ნებისმიერი უმცირესობის წარმომადგენლის უფლებები, ამ საკითხებზე განსხვავებული პოზიციები არ გვაქვს", _განაცხადა ,,ჯი-ეიჩ-ენთან" საუბარში ბესელიამ და აღნიშნა, რომ მხოლოდ შეფასებებთან დაკავშირებით აქვთ განსხვავებული პოზიციები.
შეგახსენებთ, რომ პარლამენტის ადამიანის უფლებების დაცვისა და სამოქალაქო ინტეგრაციის კომიტეტი 17 მაისის მოვლენების შეფასების შესახებ დასკვნის პროექტი მოამზადა, რომელზეც არასამთავრობო სექტორის ნაწილს კრიტიკული მოსაზრებები აქვთ. როგორც უფლებადამცველმა თამარ გურჩიანმა, ,,პოლიტმეტრში" განაცხადა, პარლამენტის ადამიანის უფლებების დაცვის კომიტეტმა საერთოდ არ იცის რა არის ადამიანის უფლებები. ,,ადამიანის უფლებათა დაცვის კომიტეტი, რომელიც პარლამენტში მუშაობს ვნახეთ როგორი და რა დასკვნა დადო 17 მაისის მოვლენებთან დაკავშირებით. მან გამოავლინა, რომ საერთოდ არ იცის რა არის ადამიანის უფლებები", _განაცხადა გურჩიანმა.