საქართველო მასპინძლობს საერთაშორისო სავალუტო ფონდისა და მსოფლიო ბანკის ჰოლანდია-ბელგიის ჯგუფების წევრი ქვეყნების ყოველწლიურ შეხვედრას (Constituency Meeting), რომელშიც მონაწილეობენ მსოფლიო ბანკისა და სსფ-ს აღმასრულებელი დირექტორები, 15 ქვეყნის ფინანსთა და ეკონომიკის მინისტრები, ცენტრალური ბანკების მმართველები.
შეხვედრის ფარგლებში, 31 მაისს, ივ. ჯავახიშვილის სახელობის თბილისის სახელმწიფო უნივერსიტეტის პ.მელიქიშვილის სახელობის აუდიტორიაში გაიმართა საჯარო ლექცია სტუდენტებისთვის „მიმდინარე ეკონომიკური პოლიტიკის საკითხები და გამოწვევები", რომელსაც დაესწრნენსაქართველოს ფინანსთა მინისტრი ნოდარ ხადური, საქართველოს ეროვნული ბანკის ვიცე-პრეზიდენტი არჩილ მესტვირიშვილი, თსუ-ს რექტორი ალექსანდრე კვიტაშვილი, ხორვატიის ეროვნული ბანკის მმართველი ბორის ვუჯიჩი (Boris Vujcic), მონტენეგროს ცენტრალური ბანკის ალტერნატიული მმართველი ნიკოლა ფაბრისი (Nikola Fabris) საერთაშორისო სავალუტო ფონდის აღმასრულებელი დირექტორი მენო შნელი (Menno Snel), მსოფლიო ბანკის აღმასრულებელი დირექტორი ფრანკ ჰიმსკერკი (Frank Heemskerk), მსოფლიო ბანკის რეგიონალური დირექტორი სამხრეთ კავკასიაში ჰენრი კერალი (Henry Kerali)
საჯარო ლექციას დაესწრნენ ივ. ჯავახიშვილის სახელობის თბილისის სახელმწიფო უნივერსიტეტის ეკონომიკისა და ბიზნესის ფაკულტეტის, ასევე ეკონომიკის საერთაშორისო სკოლის (ISET) სტუდენტები და პროფესორ-მასწავლებლები. ლექცია ინტერაქტიულ რეჟიმში წარიმართა.
„სტუდენტებისთვის განსაკუთრებით მნიშვნელოვანია დღევანდელი შეხვედრა. მათ საშუალება აქვთ მიიღონ ინფორმაცია ადამიანებისგან, რომლებიც უშუალოდ ქმნიან პოლიტიკას, ზემოქმედებენ მაკროპოლიტიკაზე. მოხარული ვარ, რომ თსუ-ში დღეს საერთაშორისო სავალუტო ფონდისა და მსოფლიო ბანკის ხელმძღვანელებს, წევრი ქვეყნების ფინანსთა მინისტრებსა და ცენტრალური ბანკების მმართველებს საშუალება აქვთ სტუდენტებს გაუზიარონ საკუთარი გამოცდილება და მოსაზრებები," - განაცხადა საქართველოს ფინანსთა მინისტრმა ნოდარ ხადურმა.
„სასიამოვნოა, რომ დღეს საქართველოში ვიმყოფებით. ჩვენ ვხვდებით არა მარტო ოფიციალურ პირებს, არამედ ახალგაზრდა თაობასაც, რადგან მათთან კომუნიკაცია საინტერესო და მნიშვნელოვანია," - განაცხადა საერთაშორისო სავალუტო ფონდის აღმასრულებელმა დირექტორმა მენო შნელმა.
„ვფიქრობ, რომ მნიშვნელოვანია სტუდენტების მოსაზრებები, რადგან ისინი ამ ქვეყნის მომავალი თაობაა. გვაინტერესებს როგორი საქართველო სურთ მათ ნახონ მომავალში და რით შეიძლება მსოფლიო ბანკმა დახმარება გაგიწიოთ," - აღნიშნა მსოფლიო ბანკის რეგიონალურმა დირექტორმა სამხრეთ კავკასიაში ჰენრი კერალმა.
საქართველოსთვის, როგორც რეგიონის ერთ-ერთი მნიშვნელოვანი საგანმანათლებლო კერისთვის, ამგვარი ლექციები კარგი შესაძლებლობაა, ჩვენი უმაღლესი სასწავლებლების ქართველმა და უცხოელმა სტუდენტებმა სხვადასხვა ქვეყნების მთავრობის წევრებისგან, მოქმედი ფინანსისტებისა და ეკონომისტებისგან მოისმინონ ინფორმაცია გლობალურ ეკონომიკურ ტენდენციებზე, მსოფლიოს წამყვანი ქვეყნების მონეტარულ და ფისკალურ პოლიტიკაზე, მაკროეკონომიკურ მაჩვენებლებსა და პროგნოზებზე.
