უკრაინის უმაღლესი რადას თავმჯდომარე ვლადიმერ ლიტვინი აცხადებს, რომ, ნეგატიური მომენტების მიუხედავად, უკრაინის საქართველოსთან და სხვა სახელმწიფოებთან ურთიერთობა აღმავლობის გზით განაგრძობს განვითარებას.
საქართველოს პარლამენტის თავმჯდომარესთან, დავით ბაქრაძესთან შეხვედრის შემდეგ ლიტვინმა განაცხადა, რომ უკრაინასა და საქართველოს შორის ურთიერთობის გაუარესების საფუძველს ვერ ხედავს.
ლიტვინმა აღნიშნა, რომ საქართველოსა და უკრაინის ურთიერთობაში ორი მომენტი არსებობს, რომლებმაც "გარკვეული დაღი" დაასვა ორმხრივ ურთიერთობას.
მისი თქმით, საუბარია საქართველოსა და უკრაინას შორის იარაღით ვაჭრობის საკითხის გარკვევის შესახებ შექმნილ საგამოძიებო კომისიაზე. უკრაინული ოპოზიცია, ჯერძოდ კი რეგიონების პარტიის წარმომადგენლები, აცხადებდნენ, რომ უკრაინის ხელისუფლება საქართველოსთან იარაღით უკანონო ვაჭრობას ეწევა და სწორრდ ამ საკითხის გამოძიებისთვის იყო შექმნილი სპეციალური კომისია.
რადას თავმჯდომარემ ყურადღება გაამახვილა უკრაინაში ჩატარებული საპრეზიდენტო არჩევნების დროს საქარველოდან უკრაინაში ჩასულ საერთაშორისო დამკვირვებლებზე.
შეგახსენებთ, რომ უკრაინის ცესკომ ჩატარებულ საპრეზიდენტო არჩევნებზე ქართველ დამკვირვებლებს რეგისტრაციაზე უარი უთხრა.
ლიტვინმა ქართველ დამკვირვებლებზე საუბრისას აღნიშნა, რომ რამდენადაც მისთვისაა ცნობილი, "ამ საკითხთან დაკავშირებით საქართველოში გარკვევები მიმდინარეობს".
რადას თავმჯდომარემ ხაზი გაუსვა, რომ საქართველოსა და უკრაინას შორის თანამშრომლობა უნდა გაგრძელდეს, იმიტომ, რომ "პოლიტიკოსები იცვლებიან, ქვეყნები და ხალხები კი რჩებიან მუდამ".
