საქართველოს მთავარ პროკურატურაში, პროკურორებმა და მასწავლებლებმა მოზარდებთან კომუნიკაციის უნარებში ტრენინგები გაიარეს.
როგორც "ჯი-ეიჩ-ენს" აღნიშნული უწყებიდან აცნობეს, პროკურორები და მასწავლებლები თანამედროვე სწავლების მეთოდებს, მოზარდების სწრაფი სწავლების მექანიზმებს, აუდიტორიაზე ზემოქმედების ფსიქოლოგიურ კანონზომიერებებს, ეფექტურ კომინიკაციასა და სხვა საინტერესო საკითხს გაეცნენ.
ტრენინგი გაიარეს პროკურორებმა საქართველოს ყველა იმ რაიონიდან, სადაც პროექტი "საზოგადოებრივი პროკურატურა" (თბილისი, მცხეთა, ახალციხე, თელავი, ზესტაფონი, ოზურგეთი, შუახევი) ხორციელდება და ამავე რაიონების საჯარო სკოლის პედაგოგებმა.
ტრენინგს უძღვებოდა ფსიქოლოგიის მეცნიერებათა დოქტორი, ფსიქოთერაპევტი თეა გოგოტიშვილი.
პროექტი "საზოგადოებრივი პროკურატურა" საქართველოში 2006 წლიდან ხორციელდება და მისი მიზანია პროკურატურის ანგარიშვალდებულებისა და გამჭირვალობის გაზრდა, დანაშაულის პრევენციის მიმართულებით პროკურატურის ორგანოების მუშაობის ეფექტურობის უზრუნველყოფა, პროკურატურის მიერ საზოგადოების მოთხოვნების და პრობლემების გათვალისწინება, სამართალდამცავი ორგანოების მიმართ საზოგადოებრივი ნდობის ამაღლება.
პროექტის ფარგლებში პროკურორები საჯარო სკოლებში სამართლებრივ თემებზე გაკვეთილებს ატარებენ, იმართება კონკურსები, სპორტული შეჯიბრებები, დისკუსიები უშუალოდ მოსწავლეთა მონაწილეობით.
ტრენინგები პროკურატურაში "დანიის კავკასიის პროგრამის" ფარგლებში და ევროსაბჭოს მხარდაჭერით ჩატარდა.
