ორ ქვეყანას შორის შუამავლის ფუნქციის შესრულების წინადადებით მამრაძე თბილისში ვიზიტით მყოფ ეუთოს მოქმედ თავმჯდომარეს კანად საუდაბაიევს ოპოზიციის წარმომადგენლებთან შეხვედრაზე მიმართავს, რომელიც "თბილისი-მარიოტში" ამ წუთებში იმართება.

"ეუთოს შეუძლია მნიშვნელოვანი როლი გაწიოს რუსეთ-საქართველოს ურთიერთობის აღდგენის კუთხით", - განუცხადა მამრაძემ შეხვედრის დაწყების წინ ჟურნალისტებს.

შეგახსენებთ, რომ ეუთოს მოქმედი თავმჯდომარე ოპოზიციური პარტიების წარმომადგენლებს ხვდება.

შეხვედრას, რომელიც სასტუმრო "თბილისი მარიოტში" მიმდინარეობს, "დემოკრატიული მოძრაობა - ერთიანი საქართველოს" ლიდერი ნინო ბურჯანაძე, მოძრაობა "სამართლიანი საქართველოსთვის" წარმომადგენელი პეტრე მამრაძე, "ლეიბორისტული პარტიის" წევრი ნესტან კირთაძე, "ალიანსი საქარველოსთვის" წარმომადგენელი მანანა ნაჭყებია, "ეროვნულ-დემოკრატიული პარტიის" წევრი გურამ ჩახვაძე და "ქრისტიან-დემოკრატების" წარმომადგენელი ნიკა ლალიაშვილი ესწრებიან.

კანად საუდაბაიევმა თბილისში ოფიციალური შეხვედრების გამართვა დღეს, სწორედ ოპოზიციის წარმომადგენლებთან შეხვედრით დაიწყო. "თბილისი-მარიოტიდან" საუდაბაიევი საქართველოს საგარეო საქმეთა სამინისტროში მივა და ქართველ კოლეგას გრიგოლ ვაშაძეს შეხვდება. მოგვიანებით კი სტუმარი საქართველოს პარლამენტში გადაინაცვლებს, სადაც მას საკანონმდებლო ორგანოს სპიკერი დავით ბაქრაძე მიიღებს.