ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრმა ალექსი პეტრიაშვილმა მთავრობის კანცელარიაში ევროპულ საგარეო ქმედებათა სამსახურის რუსეთის, აღმოსავლეთ პარტნიორობის, ცენტრალური აზიის, რეგიონალური თანამშრომლობისა და ეუთოს დირექტორატის ხელმძღვანელ გუნარ ვიგანდთან შეხვედრა გამართა.
შეხვედრაზე მხარეებმა საქართველო-ევროკავშირის თანამშრომლობის ისეთი პრიორიტეტული მიმართულებები განიხილეს, როგორიცაა ასოცირების შესახებ შეთანხმებასა და ღრმა და ყოვლისმომცველი თავისუფალი ვაჭრობის სივრცის ჩათვლით მიმდინარე მოლაპარაკებების დროულად დასრულების მნიშვნელობა, სავიზო დიალოგი და ევროკავშირთან თანამშრომლობა "აღმოსავლეთ პარტნიორობის" ფარგლებში.
შეხვედრაზე ყურადღება გამახვილდა რუსეთ-საქართველოს კონფლიქტის მშვიდობიანი გზით მოგვარებისთვის საქართველოს ხელისუფლების მიერ გადადგმულ ნაბიჯებსა და ჟენევის ფორმატის შენარჩუნების მნიშვნელობაზე. ამასთან, სახელმწიფო მინისტრმა ხაზგასმით აღნიშნა საქართველოს ოკუპირებულ ტერიტორიებზე ევროკავშირის სადამკვირვებლო მისიის დაშვების აუცილებლობა.
შეხვედრისას საუბარი შეეხო ევროკავშირის მიერ საქართველოსთვის გამოყოფილი დახმარების მნიშვნელობას და გამოითქვა მზადყოფნა, გაგრძელდეს თანამშრომლობა დახმარების მაქსიმალურად ეფექტიანად გამოყენებისათვის.
შეხვედრაზე, ასევე, განიხილეს საქართველო-ევროკავშირს შორის 2014-2020 წლებში თანამშრომლობის პრიორიტეტული მიმართულებების ჩამოყალიბების საკითხი. სახელმწიფო მინისტრის განცხადებით ევროკომისიას უკვე ეცნობა საქართველოს მთავრობის შეთანხმებული პოზიცია თანამშრომლობის პრიორიტეტულ მიმართულებებთან დაკავშირებით.
გუნარ ვიგანდთან შეხვედრაზე, ასევე, მხარებმა ისაუბრეს საქართველოს მთავრობის მიერ მიღებულ გადაწყვეტილებაზე ნატო-ს შესახებ საინფორმაციო ცენტრის საქმიანობის არეალის გაფართოებასთან დაკავშირებით, რომელიც "ნატო-სა და ევროკავშირის შესახებ საინფორმაციო ცენტრად" ტრანსფორმირდა. ამიერიდან საინფორმაციო ცენტრის ფუნქციებში შედის როგორც ნატოს, ისე ევროკავშირისა და ევროინტეგრაციასთან დაკავშირებული რეფორმების შესახებ საზოგადოების ინფორმირებულობის გაზრდა.
როგორც შეხვედრის დასრულების შემდეგ ალექსი პეტრიაშვილმა ჟურნალისტებთან განაცხადა ძალიან სასარგებლო შეხვედრა გაიმართა ევროკავშირის მაღალი რანგის წარმომადგენელთან, სადაც განხილული იყო უმნიშვნელოვანესი საკითხები და ევროკავშირი გააგრძელებს დახმარებას საქართველოში რეფორმების განხორციელების კუთხით.
