ერგნეთში ინციდენტების პრევენციისა და მათზე რეაგირების სამუშაო ჯგუფის 30-ე შეხვედრის დაწყების წინ ე.წ. სამხრეთ ოსეთის უგზო-უკვლოდ დაკარგული ე.წ. მოქალაქეების ნათესავებმა საქართველოს პრემიერ მინისტრსა და გენერალურ პროკურორს წერილი გაუგზავნეს. მიმართვაში ისინი მათი ნათესავების ბედის გარკვევას სთხოვენ. ინფორმაციას ამის შესახებ ე.წ. სამხრეთ ოსეთის ბეჭდვისა და ინფორმაციის კომიტეტი ავრცელებს.
დაკარგული ადამიანების ნათესავებმა აღნიშნული მიმართვა ჟენევის მოლაპარაკებათა თანათავმჯდომრეს ეუთოს მხრიდან ანდრი დეშიცას გადასცეს. კომიტეტის ინფორმაციით, ანდრი დეშიცამ დაარწმუნა ნათესავები, რომ იგი ამ საკითხს ყველა დონეზე წამოსწევს წინ.
"მე გადავცემ თქვენს მიმართვას იმ ადამიანებს ვისთვისაც არის ის განკუთვნილი. ამ საკითხს კონტროლზე ავიყვან და როგორც კი რამიმე სახის ინფორმაცია გვექნება ჩვენ ამ ინფორმაციას გადმოგცემთ", _ განაცხადა დეშიცამ.
