საქართველოს საგარეო საქმეთა სამინისტროს დელეგაციამ მინისტრის მოადგილის, დავით ჯალაღანიას ხელმძღვანელობით, მონაწილეობა მიიღო აფრიკის კავშირის რიგით მე-20 სამიტში, რომელიც გაიმართა 2013 წლის 24-28 იანვარს ეთიოპიის დედაქალაქ ადის-აბებაში.
საქართველოს დელეგაცია დამკვირვებლის სტატუსით დაესწრო აფრიკის კავშირის მინისტრთა 22-ე სესიას და სახელმწიფოს მეთაურთა მე-20 ასამბლეას.
სამიტის ფარგლებში საქართველოს დელეგაციამ გამართა ორმხრივი შეხვედრები აფრიკის კავშირის წევრი სახელმწიფოების დელეგაციებთან და ასევე, აფრიკის კავშირის ხელმძღვანელ პირებთან. შეხვედრების დროს განიხილეს იქნა აფრიკის ქვეყნებთან საქართველოს მიმდინარე ორმხრივი და მრავალმხრივი ურთიერთობების საკითხები და ურთიერთსასარგებლო თანამშრომლობის განვითარების პერსპექტივები.
სამიტის ფარგლებში შედგა საუბარი აფრიკის კავშირის კომისიის თავმჯდომარეს, ნკოსაზა დლამინი ზუმასა და საქართველოს დელეგაციის ხელმძღვანელს შორის. შეხვედრისას დავით ჯალაღანიამ მიულოცა ნკოსაზა დლამინი ზუმას მეტად მნიშვნელოვან პოსტზე დანიშვნა და უსურვა წარმატებები საქმიანობაში. საუბრისას ხაზი გაესვა საქართველოს მიერ მუდმივი წარმომადგენლის სტატუსის მიღებისა და არსებული ურთიერთობების შემდგომი განვითარების მნიშვნელობას.
სამიტის ფარგლებში, აგრეთვე, გაიმართა ორმხრივი შეხვედრა საქართველოსა და ეთიოპიას შორის. ეთიოპიის მხარეს წარმოადგენდა სახელმწიფო მინისტრი ბერჰანე გებრე-ქრისტოსი. შეხვედრისას ხაზი გაესვა ორმხრივი ურთიერთობების შემდგომი განვითარების მნიშვნელობას. ამ კუთხით, განსაკუთრებით აღინიშნა ადის-აბებაში საქართველოს საელჩოს გახსნა და ელჩის დანიშვნა. ხაზი გაესვა ორი ქვეყნის ხანგრძლივ ისტორიას და მდიდარ კულტურას, როგორც ქვეყნებს შორის ურთიერთობების განვითარების ხელშემწყობ ფაქტორს და გამოითქვა სურვილი, განვითარდეს ურთიერთსასარგებლო თანამშრომლობა კულტურის, ეკონომიკისადა სხვადასხვა სექტორალური მიმართულებით.
ეთიოპიის მხარემ კვლავ დაადასტურა განუხრელი მხარდაჭერა საქართველოს სუვერენიტეტისა და ტერიტორიული მთლიანობისადმი საერთაშორისოდ აღიარებული საზღვრების ფარგლებში.
სამიტის ფარგლებში გამართული შეხვედრებისას აფრიკის სახელმწიფოები ხაზგასმით მიესალმნენ აფრიკის კავშირში საქართველოს მიერ დამკვირვებლის სტატუსის მოპოვებასა და აქტიურ დიპლომატიურ ჩართულობას.
